Հանրային հեռուստաընկերությունը ներողություն է խնդրել սեպտեմբերի 27-ին Թաթա Սիմոնյանի համերգը հեռարձակելու համար
2 րոպեի ընթերցում
Հայաստանի Հանրային հեռուստաընկերությունը ներողություն է խնդրել 2026 թվականի սեպտեմբերի 27-ին՝ 44-օրյա պատերազմի մեկնարկի տարելիցի օրը, Թաթա Սիմոնյանի համերգը հեռարձակելու համար։
«Սեպտեմբերի 27-ին Հանրային հեռուստաընկերության եթերում հեռարձակված ժամանցային համերգը սխալ էր, և մենք ամբողջությամբ ընդունում ենք դրա պատասխանատվությունը։
Մենք չենք փորձելու տեղի ունեցածն արդարացնել ծրագրային, տեխնիկական կամ աշխատանքային հանգամանքներով։
Ներողություն ենք խնդրում կատարվածի համար»,- «Արմենպրես»-ի փոխանցմամբ՝ հայտնում են հեռուստաընկերությունից՝ նշելով, որ վերանայվում են համապատասխան աշխատանքային ընթացակարգերը՝ նման դեպքերի կրկնությունը բացառելու համար։
Հայտարարությամբ հանդես էր եկել նաև երգիչ Թաթա Սիմոնյանը՝ շեշտելով, որ սեպտեմբերի 27-ին իր համերգի ցուցադրումը Հանրային հեռուստաընկերության կողմից համարում է կոպիտ սխալ: Երգիչն ընդգծել էր, որ նյութը օգտագործվել է առանց իր հետ համաձայնեցնելու։
«Հասկանում եմ ու միանգամայն համաձայն եմ. սեպտեմբերի 27-ին անթույլատրելի էր եթերում ցուցադրել այդ համերգը:
Ես ներողություն եմ խնդրում կատարվածի համար, բայց կարևոր եմ համարում տեղեկացնել, որ համերգը Հանրային հեռուստաընկերության սեփականությունն է: Նյութն օգտագործվել է առանց ինձ հետ համաձայնեցնելու:
Այս օրով իմ համերգի ցուցադրումը Հանրային հեռուստաընկերության կողմից համարում եմ՝ արդարացում չունեցող կոպիտ սխալ:
Փառք մեր նահատակներին։ Խոնարհվում եմ նրանց հիշատակի առջև»,– գրել էր Թաթա Սիմոնյանը։
2020 թվականի սեպտեմբերի 27-ին Ադրբեջանի կողմից սկսված և 44 օր տևած պատերազմում հայկական կողմից զոհվել է 3,833 անձ, որոնցից 3,755-ը՝ զինծառայողներ, 78-ը՝ քաղաքացիական անձինք։ Մինչ օրս անհայտ է 191 անձի գտնվելու վայրը, որոնցից 172-ը՝ զինծառայողներ, 19-ը՝ քաղաքացիական անձինք: