Քաջարանի թունելի շինարարության տեխհսկողության հարցով պայմանագրային բանակցություններ են կայացել ընտրված կազմակերպության ներկայացուցիչների հետ
2 րոպեի ընթերցում
«Ճանապարհային դեպարտամենտ» հիմնադրամում տեղի են ունեցել պայմանագրային բանակցություններ՝ Քաջարանի թունելի շինարարության և մոտեցնող ճանապարհների վերակառուցման տեխնիկական հսկողության խորհրդատվական ծառայությունների ձեռքբերման միջազգային բաց մրցույթի արդյունքում ընտրված կազմակերպության ներկայացուցիչների հետ։
«Արմենպրես»-ի փոխանցմամբ՝ Հիմնադրամի տարածած հաղորդագրության մեջ նշվում է, որ բանակցությունների շրջանակներում քննարկվել են պայմանագրային մի շարք կետեր, որոնք, մասնավորապես, առնչվում են ծառայությունների մատուցման ժամկետներին, խորհրդատուի աշխատակազմին, պայմանագրի իրավական և ֆինանսական կողմերին։
Քննարկումների արդյունքում վերջնականացվել է պայմանագրի տեքստը։ Նախաստորագրված տարբերակը կներկայացվի ֆինանսավորող կողմին՝ Կայունացման և զարգացման եվրասիական հիմնադրամին, և հաստատում ստանալուց հետո կստորագրվի կողմերի միջև։
Նշված պայմանագրով նախատեսվում է մատուցել Քաջարանի շուրջ 7կմ երկարությամբ թունելի կառուցման և մոտ 4կմ մոտեցնող ճանապարհների վերակառուցման աշխատանքների տեխնիկական հսկողության խորհրդատվական ծառայություններ:
Ընդգծվում է, որ Քաջարանի թունելի կառուցման և մոտեցնող ճանապարհների վերակառուցման աշխատանքների պատվիրատուն «Ճանապարհային դեպարտամենտ» հիմնադրամն է։