1 րոպեի ընթերցում
Տավուշի մարզի Դիլիջան քաղաքում սեպտեմբերի 5-ին տեղի կունենա «Արվեստների և արհեստների» համահայկական փառատոնը։
«Արմենպրես»-ի փոխանցմամբ՝ այդ մասին հաղորդագրություն է տարածել Մշակույթի և տուրիզմի պրոպագանդման Media Onix ընկերությունը, որը փառատոնի կազմակերպիչն է։
Փառատոնն անցկացվում է ՀՀ էկոնոմիկայի նախարարության Զբոսաշրջության կոմիտեի, ՀՀ տարածքային կառավարման և ենթակառուցվածքների նախարարության, Հայաստանի բոլոր մարզերի մարզպետարանների աջակցությամբ։
Նշվում է, որ փառատոնն անցկացվում է արդեն 15-րդ անգամ։ Այն այս անգամ առանձնակի է իր ընդգրկվածությամբ՝ ներկայացված են ՀՀ բոլոր մարզերի քաղաքային և գյուղական համայնքները։
Փառատոնի շրջանակներում ավելի քան 70 տաղավարներում Հայաստանի բոլոր մարզերի քաղաքային և գյուղական համայնքների ստեղծագործ անհատներն ու մշակութային կենտրոնները ցուցադրում են իրենց աշխատանքները, կազմակերպում վարպետության դասեր։ Ներկայացնում են նաև իրենց տարածաշրջանին բնորոշ ուտեստներ, ազգային խոհանոցին բնորոշ առանձնահատկություններով և ավանդական հայկական հյուրասիրությամբ։