«ՄՈՒՇ» ապրանքանիշի կոլայի համով գազավորված ըմպելիքը չի արտադրվի

Սննդամթերքի անվտանգության տեսչական մարմնի տեսուչները վերահսկողական միջոցառման շրջանակում նմուշառում են իրականացրել Լոռու մարզի Վանաձոր քաղաքում գտնվող՝ «Գոռմուշ» ՍՊ ընկերությանը պատկանող «Մուշ» ապրանքանիշի գազավորված ըմպելիքների արտադրամասում։

Ինչպես «Արմենպրես»-ը տեղեկանում է Սննդամթերքի անվտանգության տեսչական մարմնից, լաբորատոր փորձաքննության արդյունքում պարզվել է, որ «Գազավորված ոչ ալկոհոլային ըմպելիք կոլայի համով» արտադրատեսակի նմուշը «մեզոֆիլ աէրոբ մանրէների քանակ» (ՄԱՄՔ) և «խմորասնկեր/բորբոսասնկեր (գումարային)» ցուցանիշներով չի համապատասխանում Մաքսային միության տեխնիկական կանոնակարգի պահանջներին։

Տեսչական մարմնի ղեկավարի որոշմամբ՝ կասեցվել է արտադրամասի արտադրական գործունեության առանձին գործառույթը՝ նշված արտադրատեսակի արտադրությունը։ Միաժամանակ սահմանվել է հայտնաբերված խախտումները վերացնելու ժամկետ։

Տեսչական մարմինը վերահսկողական միջոցառումների շրջանակում շարունակում է հետևել սահմանված պահանջների կատարմանը։