2 րոպեի ընթերցում
Բրիտանուհի Էթել Քաթերհեմը, որը համարվում է աշխարհում ապրող ամենատարեց մարդը, նշում է իր 117-ամյակը: «Արմենպրես»-ի փոխանցմամբ՝ BBC-ն հաղորդում է, որ երկարակյաց կինը, որը բնակվում է Լոնդոնի մերձակայքի Սուրեյի կոմսության ծերանոցում, ծննդյան օրը կնշի ընտանիքի և բարեկամների հետ:
Այս առիթով Գինեսի ռեկորդների գիրքը տարածել է հայտարարություն, որում նշված է, որ Քաթերհեմը պաշտոնապես ճանաչվել է 117 տարեկանը լրացած առաջին բրիտանուհին:
Քաթերհեմը ծնվել է 1909 թվականի օգոստոսի 21-ին Հեմփշիրի կոմսությունում: Նա վերապրել է երկու համաշխարհային պատերազմները և Էդուարդ VII թագավորի (1841-1910) հպատակներից վերջինն է։
18 տարեկանում Քաթերհեմը տեղափոխվել է Հնդկաստան, որտեղ աշխատել է որպես դայակ։ Ավելի ուշ իր զինվորական ամուսնու հետ ապրել է Հոնկոնգում և Ջիբրալթարում, որտեղ ծառայել է ամուսինը: Անգլիա վերադառնալուց հետո նա երկու դուստր է ունեցել։
Քաթերհեմը ոչ միայն ավելի երկար է ապրել իր ամուսնուց, որը մահացել է 1976 թվականին, այլև իր դուստրերից, որոնք մահացել են համապատասխանաբար 2000-ականների սկզբին և 2020 թվականին։ Նրա քույր Գլեդիս Բեբիլասը նույնպես եղել է երկարակյաց. նա մահացել է 2002 թվականի մարտին՝ 107 տարեկանում:
Գինեսի ռեկորդների գրքի պաշտոնական տվյալների համաձայն՝ երկարակեցության բացարձակ ռեկորդը պատկանել է ֆրանսուհի Ժաննա Կալմանին: 1997 թվականի օգոստոսին մահվան պահին նա եղել է 122,5 տարեկան: