Ռազմական ոստիկանության ծառայողները կանխարգելիչ միջոցառումներ են իրականացնում ՊՆ զորամասերում
1 րոպեի ընթերցում
Հայաստանի պաշտպանության նախարարության ռազմական ոստիկանության պետ, գեներալ-մայոր Արամ Հովհաննիսյանի հանձնարարությամբ՝ ռազմական ոստիկանության ծառայողները ՊՆ զորամասերում մեծ ծավալով անցկացնում են ընդհանուր կանխարգելիչ, ինչպես նաև անհատական կանխարգելիչ միջոցառումներ:
«Արմենպրես»-ի փոխանցմամբ՝ այս մասին հաղորդագրություն է տարածել ՀՀ պաշտպանության նախարարությունը։
«Պարբերաբար ընթանում է նաև «Կարգազանց» միջոցառումը, որի նպատակը ստորաբաժանումներում կարգապահության պահպանման, ներքին ծառայության պատշաճ կազմակերպման, զինծառայողների պարտականությունների կատարման, կայազորների տարածքներում և բնակավայրերում համազգեստի կրման կանոնների խստիվ պահպանման, ինչպես նաև զինվորական ավտոտրանսպորտային միջոցների անվտանգ շահագործման նկատմամբ վերահսկողության իրականացումն է»,- նշված է հաղորդագրության մեջ։
Հիշեցնենք, որ վերջին շրջանում բանակում գրանցվող ինքնասպանությունների ֆոնին աշխատանքից ազատման դիմում էր ներկայացրել Ռազմական ոստիկանության նախկին պետ Աշոտ Զաքարյանը։ Ռազմական ոստիկանության նոր պետ է նշանակվել Արամ Հովհաննիսյանը։