2 րոպեի ընթերցում
Դոհան հնարավոր է համարում նոր համաձայնագրի կնքումը Միացյալ Նահանգների և Իրանի միջև, որը թույլ կտա լիովին ավարտել ընթացիկ հակամարտությունը: Ինչպես «Արմենպրես»-ը տեղեկանում է ՏԱՍՍ գործակալությունից, այս մասին հայտարարել է Կատարի արտաքին գործերի նախարարության պաշտոնական ներկայացուցիչ Մաջիդ բեն Մուհամմեդ ալ Անսարին։
«Մեր խնդիրն այժմ այն է, որ կրկին հասնենք հրադադարի, դադարեցնենք շարունակվող սրացումը և կողմերին վերադարձնենք բանակցությունների», - ասել է դիվանագետը:
Ընդ որում, նա նշել է, որ Վաշինգտոնն ու Թեհրանը կարող են «հասնել նոր համաձայնության, որը լիովին վերջ կդնի այս պատերազմին»։
Խոսնակը հավելել է, որ Կատարն աշխատում է Միացյալ Նահանգների և Իրանի միջև հրադադարի վերականգնման ուղղությամբ։ Նրա խոսքով՝ ջանքերը կենտրոնացած են լարվածության նվազեցմանը և փոխըմբռնման հուշագրի կատարմանը վերադառնալուն:
Ալ Անսարին նաև հայտարարել է, որ Դոհան սպասում է Օմանի և Իրանի միջև Հորմուզի նեղուցի շուրջ համաձայնությունների ձեռք բերման, ինչը թույլ կտա վերսկսել բանակցություններն ԱՄՆ-ի և Իրանի միջև:
«Մենք սպասում ենք եղբայրական Օմանի և Իրանի միջև նեղուցի վերաբերյալ համաձայնության ձեռք բերման, որը թույլ կտա մեզ…. վերադառնալ բանակցությունների ձևաչափին», - ասել է դիվանագետը: