1 րոպեի ընթերցում
Ֆիլիպինների հյուսիսում ինն օր շարունակվող հորդառատ անձրևների հետևանքով առաջացած ջրհեղեղները, սողանքներն ու այլ պատահարները խլել են առնվազն 13 մարդու կյանք։ Այդ մասին տեղեկացնում է «Արմենպրես»-ը՝ վկայակոչելով Euronews-ը։
Արևադարձային փոթորիկների հետևանքով ուժեղացած անձրևները հանգեցրել են Լուսոն կղզում դպրոցների և պետական հիմնարկների փակմանը, ինչպես նաև առաջացրել են փողոցների հեղեղումներ մայրաքաղաք Մանիլայում։
Բագիո առողջարանային քաղաքում չորս մարդ է զոհվել, երբ անձրևաջրից հագեցած լանջը փլուզվել և ընկել է մի քանի տների վրա։ Փրկարարները մաքրել են փլատակները՝ որոնելով ևս վեց մարդու, որոնք դեպքից մեկ օր անց դեռևս անհետ կորած էին համարվում։
Կառավարության օդերևութաբան Դան Վիլամիլը հայտնել է, որ մայրաքաղաքից դեպի հյուսիս գտնվող հանգստավայր-քաղաքում արդեն իսկ 47%-ով ավելի շատ տեղումներ են գրանցվել, քան սովորական ամսական միջին ցուցանիշն է։ Օգոստոսի 1-ից 9-ն ընկած ժամանակահատվածում Բագիոյում գրանցվել են ամենաշատ տեղումները՝ ընդհանուր առմամբ 1413,2 միլիմետր։
Իսկ Մանիլայի ագլոմերացիայի որոշ հատվածներում արդեն տեղացել է օգոստոս ամսվա միջին տեղումների քանակի մոտ 90%-ը։