Ազգային արժեքների փոխանցման ամենակայուն ճանապարհը կրթությունն ու մշակույթն են. ՌԴ-ում «Անի» մշակութային կենտրոնի հիմնադիր
3 րոպեի ընթերցում
Մոսկվայում 2013 թվականին հիմնադրված «Անի» մշակութային կենտրոնը տարիների ընթացքում դարձել է հայկական ազգային պարարվեստի պահպանման, զարգացման և միջազգային ներկայացման կարևոր հարթակներից մեկը։
«Արմենպրես»-ի Մոսկվայի թղթակցի հետ զրույցում կենտրոնի հիմնադիր-տնօրեն Արփինե Հակոբյանն ասաց, որ համանուն պարային անսամբլի գլխավոր առաքելությունը ոչ միայն երիտասարդ սերնդին հայկական ժողովրդական-բեմական պարեր ուսուցանելն է, այլև նրանց մեջ ազգային ինքնագիտակցություն, հայկական մշակույթի և ավանդույթների նկատմամբ սեր ձևավորելը։
««Անի» պարային անսամբլում իրականացվում են հեղինակային կրթական ծրագրեր, որոնք հիմնված են տարիների մանկավարժական և բեմադրական փորձի վրա։ Կոլեկտիվում դասավանդվում են հայկական ժողովրդական-բեմական և կովկասյան ժողովրդական պարեր։ Մեր կրթական գործունեությունն ուղղված է սփյուռքում հայկական ինքնության պահպանմանը և ազգային արժեքների փոխանցմանը»,- նշեց Արփինե Հակոբյանը։
Նրա խոսքով՝ հիմնադրումից ի վեր «Անի» պարային անսամբլը մասնակցել է բազմաթիվ միջազգային մրցույթների և փառատոների՝ արժանանալով բարձր գնահատանքի ու մրցանակների։ 2025 թվականին Արփինե Հակոբյանը, որպես «Անի» պարային անսամբլի հիմնադիր, արժանացել է Հայաստանի Հանրապետության դեսպանության մշակութային կենտրոնի մեդալին՝ հայ-ռուսական մշակութային ժառանգության պահպանման գործում ունեցած ներդրման համար։
Չնայած Հայաստանից դուրս երկար տարիներ ապրելու և ստեղծագործելու հանգամանքին՝ մշակութային կենտրոնի տնօրենը հայրենիքի հետ կապը համարում է իր գործունեության առանցքային արժեքներից մեկը։ Նրա խոսքով՝ յուրաքանչյուր պարային բեմադրություն պարզապես գեղարվեստական ստեղծագործություն չէ, այլ Հայաստանի պատմության, մշակույթի և ազգային ոգու ներկայացում միջազգային հանդիսատեսին։
«Հայկական ինքնության պահպանման գործում կարևորելով կրթության դերը՝ մենք հիմնադրել ենք նաև «Լույս» հայկական կիրակնօրյա կրթարանները, որտեղ երեխաները սովորում են հայոց լեզու, պատմություն, մշակույթ և ազգային պար։ Համոզված եմ, որ ազգային արժեքների փոխանցման ամենակայուն ճանապարհը կրթությունն ու մշակույթն են, քանի որ հենց դրանց միջոցով է ձևավորվում սերունդների կապը հայրենիքի և սեփական արմատների հետ»,- եզրափակեց Արփինե Հակոբյանը։