2 րոպեի ընթերցում
ԱՄՆ-ի և Իրանի բանակցողները շարունակում են քննարկել հակամարտության կարգավորման հետ կապված տեխնիկական հարցերը։ «Արմենպրես»-ի փոխանցմամբ, այս մասին հաղորդում է CNN-ը՝ հղում անելով ամերիկյան աղբյուրին։
«ԱՄՆ-ն շարունակում է հանձնառու լինել խնդրի լուծում գտնելուն, և փորձագետների մակարդակով բանակցությունները շարունակվում են», - ասել է աղբյուրը։
Նա ընդգծել է, որ Վաշինգտոնը կարծում է, որ Թեհրանը դեռևս չի կատարում ԱՄՆ-ի հետ ստորագրված փոխըմբռնման հուշագրի հիմնական դրույթները։ Նա բացատրել է, որ անընդունելի է, որ իրանական ուժերը կրակ բացեն Հորմուզի նեղուցում գտնվող նավերի վրա։
Միացյալ Նահանգների զինված ուժերը հուլիսի 8-ին նոր հարվածներ են հասցրել Իրանին՝ Հորմուզի նեղուցը նավագնացության համար բաց պահելու նպատակով։ Ամերիկյան հարվածներից հետո Իրանը պատասխան հարձակումներ է իրականացրել Քուվեյթի և Բահրեյնի ուղղությամբ։
Թուրքիայում հուլիսի 8-ին անցկացվող ՆԱՏՕ-ի գագաթնաժողովից առաջ լրագրողների հարցին, թե արդյոք փոխըմբռնման հուշագիրն այլևս ուժի մեջ չէ, Թրամփը պատասխանել էր. «Շատ հետաքրքիր հարց է։ Իմ կարծիքով՝ այն ավարտված է։ Ես չեմ ցանկանում այլևս գործ ունենալ նրանց հետ»։
«Եթե մենք համաձայնագիր կնքենք Իրանի հետ, վստահ չեմ, որ այն կպահպանվի։ Իմ կարծիքով՝ նրանք շատ անազնիվ մարդիկ են»,- ավելի ուշ հավելել էր Թրամփը։
Նա հավելել էր, որ չի կարծում, թե պատերազմը կվերսկսվի․ «Ինչ էլ տեղի ունենա, շատ արագ կավարտվի... և միայն կբարձրացնի անվտանգությունը, այդ թվում՝ նավթի մատակարարումների համար»։
Կատարվածին արձագանքել էր նաև իրանական կողմը։ Մասնավորապես, Իրանի ԱԳ նախարարությունը հայտարարություն էր տարածել՝ «ռազմական հանցագործություն» որակելով ամերիկյան կողմի գործողությունները։