Սանիտարահիգիենիկ նորմերի խախտումներն անհամատեղելի են սննդամթերքի անվտանգության պահանջների հետ․ կասեցվել է լիմոնադի արտադրամասի գործունեությունը
2 րոպեի ընթերցում
Սննդամթերքի անվտանգության տեսչական մարմնի տեսուչները Արագածոտնի մարզ Աշտարակ քաղաքում վերահսկողական միջոցառումներ են իրականացրել անհատ ձեռնարկատեր Սարգիս Թումանյանին պատկանող լիմոնադի արտադրամասում։
Ինչպես «Արմենպրես»-ը տեղեկանում է ՍԱՏՄ-ի տարածած հաղորդագրությունից, սանիտարահիգիենիկ նորմերի այն խախտումները, որ հայտնաբերվել են ստուգման ընթացքում, անհամատեղելի են սննդամթերքի անվտանգության պահանջների հետ:
«Արտադրական շինություններում չի ապահովվել տեխնիկական սարքավորումների անհրաժեշտ տեխնիկական սպասարկումը և ընթացիկ վերանորոգումը, մաքրման, լվացման, ախտահանման, միջատազերծման և կրծողների ոչնչացման գործընթացներ իրականացնելու հնարավորությունը։
Արտադրամասը չի պաշտպանվել կեղտի կուտակումներից, արտադրվող սննդամթերքում մասնիկների թափվելու, արտադրական շինությունների մակերևույթին կոնդենսատի, բորբոսի առաջացման վտանգից։
Չեն եղել պայմաններ պարենային (սննդային) հումքի, փաթեթավորման նյութերի և սննդամթերքի պահպանման համար, հատակների, պատերի մակերևույթները պատրաստված չեն եղել անջրանցիկ, լվացվող, ախտահանվող նյութերից։
Առաստաղի ներքին մակերևույթի կառուցվածքը ապահով չի եղել, չի կանխարգելվել կեղտի կուտակումը, բորբոսի առաջացումը և մասնիկների թափվելու հնարավորությունը։
Սննդամթերքի հետ շփման մեջ գտնվող տեխնոլոգիական սարքավորումները, գործիքները, պարագաները պատրաստված չեն եղել համապատասխան նյութերից, չեն պահվել նորոգ վիճակում»,– նշված է հաղորդագրության մեջ։
Տեսչական մարմնի ղեկավարի որոշմամբ՝ լիմոնադի այս արտադրամասի արտադրական գործունեությունը կասեցվել է, տնտեսավարողին հանձնարարվել է ձեռնարկել անհրաժեշտ միջոցներ և արտադրամասը համապատասխանեցնել իրավական ակտերով սահմանված պահանջներին:
Հայտնաբերված խախտումները վերացնելու համար սահմանվել է ժամկետ: