4 րոպեի ընթերցում
«Արամ Խաչատրյան» համերգասրահում կայացած Խաչատրյանի անվան միջազգային մրցույթի ամփոփիչ գալա համերգը դարձավ ոչ միայն բարձրարվեստ երաժշտական երեկո, այլ նաև կարևոր հարթակ՝ ընդգծելու մշակույթի և ռազմավարական գործընկերության փոխկապակցվածությունը։
Երկրորդ տարին անընդմեջ մրցույթի ռազմավարական գործընկերն է Freedom Broker Armenia ընկերությունը, որը հետևողականորեն ներգրավված է մշակութային երկարաժամկետ զարգացման նախաձեռնություններում։
Գալա երեկոյի ընթացքում ընկերության տնօրեն Հովակ Հովակիմյանը ներկա էր միջոցառմանը և հանդիսավոր կերպով հանձնեց հատուկ մրցանակներից մեկը՝ ընդգծելով գործընկերության անմիջական և կենդանի բնույթը։
«Արմենպրես»-ը Freedom Broker Armenia-ի տնօրեն Հովակ Հովակիմյանի հետ զրուցել է Խաչատրյանի անվան միջազգային մրցույթի, ռազմավարական գործընկերության և մշակութային զարգացման մասին։
Հարցազրույցը ներկայացնում ենք ստորև․
– Արդեն երկրորդ տարին Freedom Broker Armenia-ն մրցույթի ռազմավարական գործընկերն է։ Ինչպե՞ս եք գնահատում այս համագործակցությունը։
– Խաչատրյանի անվան միջազգային մրցույթի և ընդհանրապես «Արամ Խաչատրյան» մշակութային հիմնադրամի հետ մեր համագործակցությունը շատ ավելի լայն իմաստ ունի, քան պարզ գործընկերությունը։ Սա վստահության և ընդհանուր տեսլականի վրա հիմնված երկարաժամկետ գործընկերություն է։ Մենք տեսնում ենք, որ մրցույթը ոչ միայն բացառիկ երաժշտական իրադարձություն է Հայաստանում, այլ միջազգային հարթակ, որը ձևավորում է նոր սերնդի երաժիշտների ճանապարհը և ներկայացնում մեր երկիրն ամբողջ աշխարհում։
– Ինչո՞վ է Freedom Broker Armenia-ի համար կարևոր ներգրավված լինել մշակութային նման բարձր մակարդակի միջազգային նախագծում։
– Մենք համոզված ենք, որ մշակույթը հասարակության զարգացման հիմքերից մեկն է։ Երբ համագործակցում ենք նման մեծամասշտաբ մրցույթին, իրականում մենք ներդրում ենք կատարում միանգամից կրթության, ստեղծագործական մտածողության և միջազգային երկխոսության մեջ։ Հատուկ ցանկանում եմ կարևորել Արամ Խաչատրյանի կոմպոզիտորական ժառանգության պահպանումն ու հանրահռչակումը, որը կյանքի է կոչվում համատեղ ուժերով և որը մեր երկրի հեղինակությունը բարձրացնելու լավագույն ուղղություններից է։
– Դուք անձամբ ներկա էիք գալա համերգին և հանձնեցիք հատուկ մրցանակներից մեկը։ Ի՞նչ նշանակություն ուներ այդ պահը Ձեզ համար։
– Դա շատ խորհրդանշական և ոգևորիչ պահ էր։ Երբ դու ոչ միայն ռազմավարական գործընկեր ես, այլ նաև անմիջականորեն կանգնած ես երիտասարդ երաժիշտների հաջողության կողքին, դա փոխում է համագործակցության ամբողջ ընկալումը։ Այդ պահին դու տեսնում ես աշխատանքի իրական արդյունքը՝ մարդկանց, ովքեր տարիների աշխատանքով հասնում են կատարողական այս մակարդակին։
– Ինչպե՞ս եք գնահատում մասնավոր հատվածի դերը մշակույթի զարգացման մեջ Հայաստանում և միջազգային հարթակում։
– Այդ դերը գնալով ավելի կարևոր է դառնում։ Պետական և մասնավոր հատվածի համագործակցությունը կարող է ստեղծել կայուն համակարգ, որը թույլ է տալիս երկարաժամկետ պլանավորում իրականացնել և ավելի մեծ ազդեցություն ունենալ։ Մասնավոր հատվածը բերում է ճկունություն, նոր մոտեցումներ և միջազգային փորձ, ինչը շատ կարևոր է այն նախագծերի համար, որոնք միջազգային ընդլայնման մեծ հնարավորություններ ունեն։
– Ինչպե՞ս եք տեսնում այս համագործակցության ապագան։
– Մենք սա դիտարկում ենք որպես երկարաժամկետ գործընկերություն։ Եթե խոսում ենք երաժշտարվեստի զարգացման մասին, ապա դա չի կարող լինել կարճաժամկետ գործընթաց. արդյունքները երևում են տարիների ընթացքում։ Մեր նպատակն է շարունակել զարգացնել այս համագործակցությունը և ավելի մեծ ազդեցություն ունենալ միջազգային մակարդակում մրցույթը և Խաչատրյանի անունը ներկայացնելու ճանապարհին։