«Քույր դպրոցներ» ծրագրով Գորիսի Ա. Սաթյանի անվան երաժշտական դպրոցը հյուրընկալվել է Երևանի Սայաթ-Նովայի անվան երաժշտական կրթօջախում

«Քույր դպրոցներ» մշակութային կրթության նպատակային ծրագրի շրջանակում Գորիսի Ա. Սաթյանի անվան երաժշտական դպրոցի պատվիրակությունը հունիսի 3-4-ը հյուրընկալվում է Երևանում:

«Արմենպրես»-ի հաղորդմամբ՝ այս մասին հայտնում են ՀՀ կրթության, գիտության, մշակույթի և սպորտի նախարարությունից՝ նշելով, որ «Քույր դպրոցներ» ծրագիրն իրականացվում է գերատեսչության աջակցությամբ և Երևանի Ալ. Հեքիմյանի անվան երաժշտական դպրոցի նախաձեռնությամբ իրականացվող

Հաղորդագրության համաձայն՝ Գորիսի Ա. Սաթյանի անվան երաժշտական դպրոցի աշակերտներն համերգային ծրագրով հունիսի 3-ին ելույթ են ունեցել Երևանի Սայաթ-Նովայի անվան երաժշտական դպրոցի մեծ դահլիճում, այնուհետև մասնակցել են վարպետության դասերի:

ԿԳՄՍ նախարարի տեղակալ Դանիել Դանիելյանը ներկա է եղել է համերգին և հետևել վարպետության դասերին։

 «Այս ծրագիրն ավելի խորքային իմաստ ունի. այստեղ առաջնային է մարդկային ներկայությունը՝ համագործակցությունը, միմյանց ճանաչելը, երեխաների շփումները: Սա նաև մեր երկիրը բացահայտելու և ճանաչելու ևս մեկ առիթ է, որովհետև լավ մասնագետ, այս դեպքում՝ լավ երաժիշտ դառնալու համար կարևոր են նաև մարդկային արժեքների յուրացումն ու հայրենասիրությունը»,-ասել է նա՝ շնորհակալություն հայտնելով բոլոր կազմակերպիչներին և մասնակից աշակերտներին:

Երևանի Սայաթ-Նովայի անվան երաժշտական դպրոցի տնօրեն Գարիկ Նազարյանը կարևորել է ծրագիրը, որը նրա խոսքով, միտված է հայրենաճանաչությանը, արժեքներ ստեղծելուն, փոխճանաչություն ձևավորելուն։

Համերգի ընթացքում ելույթ են ունեցել նաև Երևանի Սայաթ-Նովայի անվան երաժշտական դպրոցի ժողնվագարանների համույթը և «Բողբողջներ» երգչախումբը:

Գորիսի դպրոցականները ներկա կլինեն Երևանի բալետային 4-րդ միջազգային փառատոնին՝ Թումանյանի անվան զբոսայգում դիտելով «Թամար» բալետային ստեղծագործության համաշխարհային պրեմիերան:

Հունիսի 4-ին երեխաների համար կկազմակերպվի շրջայց Երևանի տեսարժան վայրերով. նրանք կայցելեն նաև Երևան քաղաքի պատմության թանգարան:

«Քույր դպրոցներ» ծրագիրը գործում է 2019 թվականից․ ծրագրի շահառու են դարձել հանրապետության ավելի քան 60 երաժշտական և արվեստի դպրոցներ և շուրջ 4000 սովորողներ և մանկավարժներ:

Այս ընթացքում Երևանի և մարզերի երաժշտական և արվեստի դպրոցների միջև ձևավորել է փոխհամագործակցության, ստեղծագործական համատեղ աշխատանքի, առաջավոր փորձով, դասավանդման մեթոդներով փոխանակվելու գործուն հարթակ:

Ծրագիրը նպաստում է մշակութային կրթության տարածքային համաչափ զարգացմանը, մարզերի երաժշտական և արվեստի դպրոցներին համակարգված մեթոդական աջակցության ապահովմանը, ինչպես նաև ոլորտում ավանդույթների պահպանությանը և շարունակական զարգացմանը:

«Քույր դպրոցներ» մշակութային կրթության նպատակային ծրագրի շրջանակում իրականացվում են փոխայցելություններ, երաժշտական և արվեստի դպրոցների աշակերտներն ու մանկավարժական աշխատողները հանդես են գալիս համատեղ ծրագրերով, ելույթներով, կազմակերպվում են վարպետության դասընթացներ, իրականացվում են ճանաչողական այցեր Երևանի և մարզերի տեսարժան վայրեր, պատմամշակութային հուշարձաններ, մշակութային օջախներ:

Ծրագիրն ընդգրկված է ՀՀ կառավարության 2021-2026թթ. գործունեության միջոցառումների ցանկում՝ որպես մշակութային կրթության նպատակային ծրագիր։