Իսրայելի ԱԳ նախարարը ներողություն է խնդրել քրիստոնյաներից իսրայելցի զինվորի կողմից Հիսուս Քրիստոսի արձանը Լիբանանում վնասելու համար

Իսրայելի արտաքին գործերի նախարար Գիդեոն Սաարը ամոթալի է անվանել Հարավային Լիբանանում Իսրայելի պաշտպանության բանակի զինվորի կողմից Հիսուս Քրիստոսի արձանը վնասելու փաստը։

Ինչպես հաղորդում է «Արմենպրես»-ը, X-ում արված գրառման մեջ նա մասնավորապես նշել է. «Հարավային Լիբանանում Իսրայելի պաշտպանության բանակի զինվորի կողմից քրիստոնեական կրոնական խորհրդանիշի վնասումը լուրջ և ամոթալի է։

The damaging of a Christian religious symbol by an IDF soldier in southern Lebanon is grave and disgraceful.

I commend the IDF for its statement,
for condemning the incident, and for conducting an investigation into the matter. I’m confident that the necessary strict measures…

— Gideon Sa'ar | גדעון סער (@gidonsaar) April 20, 2026

Ես բարձր եմ գնահատում Իսրայելի պաշտպանության բանակի հայտարարությունը միջադեպը դատապարտելու և այս հարցի առնչությամբ հետաքննություն անցկացնելու վերաբերյալ։ Վստահ եմ, որ այս տգեղ արարքը կատարողի նկատմամբ կձեռնարկվեն անհրաժեշտ խիստ միջոցներ»։

Նախարարի խոսքով՝ «այս ամոթալի գործողությունը լիովին հակասում է Իսրայելի արժեքներին»։

«Իսրայելը մի երկիր է, որը հարգում է տարբեր կրոններն ու դրանց սրբազան խորհրդանիշները, և պաշտպանում է հավատքների միջև հանդուրժողականությունն ու հարգանքը։

Մենք ներողություն ենք խնդրում այս միջադեպի համար յուրաքանչյուր քրիստոնյայից, ում զգացմունքները վիրավորվել են»,- նշել է նա։

Արձանը, որը մուրճի օգնությամբ վանդալզիմի է ենթարկել իսրայելցի զինվորը, գտնվում է հարավային Լիբանանի Դեբել քրիստոնեական գյուղում՝ Իսրայելի հետ սահմանի մոտակայքում։

Իսրայելի բանակն ավելի վաղ հայտնել էր, որ միջադեպը հետաքննվում է Իսրայելի բանակի հրամանատարության կողմից։

«Համապատասխան միջոցներ կձեռնարկվեն ներգրավված անձանց դեմ», - ասվում է հայտարարության մեջ։ Նաև նշվել է, որ բանակը համագործակցում է համայնքի հետ՝ «արձանն իր տեղում վերականգնելու համար»։