Պատգամավորն առաջարկում է խստացնել թմրամիջոցների ապօրինի շրջանառության համար պատիժները

Հայաստանում վերջին տարիներին թմրամիջոցների ապօրինի շրջանառության դեպքերը զգալի աճ են գրանցել, և դրանց կանխարգելման համար անհրաժեշտ է կիրառել պատժի խստություն և անխուսափելիություն։ «Արմենպրես»-ի հաղորդմամբ՝ Ազգային ժողովում այս մասին ասաց «Քաղաքացիական պայմանագիր» խմբակցության պատգամավոր Հայկ Սարգսյանը՝ առաջարկելով փոփոխություններ կատարել ՀՀ քրեական օրենսգրքում։

«Առաջարկում եմ խստացնել պատիժները այն դեպքերում, երբ թմրամիջոցների ապօրինի շրջանառությունն իրականացվում է տեղեկատվական տեխնոլոգիաների միջոցով, օրինակ՝ «Տելեգրամ» հարթակով։ Այդպիսի հանցագործությունների համար նախատեսվող պատիժը 3-6 տարվա փոխարեն առաջարկվում է սահմանել 4-8 տարվա ազատազրկում։

Բացի այդ, առաջարկում եմ ավելի խիստ պատիժ սահմանել նաև անչափահասների ներգրավմամբ կամ նրանց նկատմամբ նման հանցագործություններ կատարելու դեպքում․ գործող 3-6 տարվա փոխարեն նախատեսվում է 6-12 տարվա ազատազրկում»,- ասաց Սարգսյանը։

Սարգսյանը նաև նշեց, որ քննարկումների ընթացքում պատրաստվում է առաջարկել լրացուցիչ խստացումներ՝ մասնավորապես առանձնապես խոշոր չափերով թմրամիջոցների շրջանառության համար մինչև 20 տարվա ազատազրկում սահմանելու վերաբերյալ։

Պատգամավորը անդրադարձել է նաև միջազգային փորձին՝ ընդգծելով, որ մի շարք երկրներում թմրամիջոցների ապօրինի շրջանառության համար կիրառվում են առավել խիստ պատիժներ՝ մինչև ցմահ ազատազրկում, իսկ որոշ երկրներում՝ նաև մահապատիժ։

Միևնույն ժամանակ նա շեշտեց, որ նախաձեռնության նպատակը քաղաքացիներին երկարաժամկետ ազատազրկման ենթարկելը չէ, այլ կանխարգելիչ ազդեցության միջոցով հանցագործությունների թվի նվազեցումը։