2 րոպեի ընթերցում
Հայաստանի Հանրապետության մարդու իրավունքների պաշտպան Անահիտ Մանասյանն ընդունել է «Մարդու իրավունքների եզդիական կենտրոն» իրավապաշտպան կազմակերպության ղեկավար Մուրազ Շամոյանին։ «Արմենպրես»-ի փոխանցմամբ՝ «Ֆեյսբուք»-ի իր էջում կատարած գրառման միջոցով Անահիտ Մանասյանը ներկայացրել է մանրամասներ հանդիպումից։
«Ողջունելով հյուրին՝ ընդգծել եմ, որ ազգային փոքրամասնությունների իրավունքների պաշտպանության ու խթանման ոլորտը իմ պաշտոնավարման սկզբից է սահմանել որպես ՄԻՊ հաստատության առաջնահերթ ուղղություն։ Հանդիպման ընթացքում քննարկվել են խոսքի ազատության, եզդիական համայնքի առնչությամբ հանրության տեղեկացվածության ոչ բավարար մակարդակի, եզդիերենի ուսուցման, վաղ ամուսնությունների կանխարգելման ոլորտում առկա, ինչպես նաև «Ազգային փոքրամասնությունների մասին» օրենքի ընդունման կարևորության հետ կապված հարցեր: Անդրադարձ է կատարվել նաև ազգային փոքրամասնությունների համայնքների առնչությամբ հասարակությունում առկա կարծրատիպերը հաղթահարելու, միջմշակութային երկխոսությունը, ազգային փոքրամասնությունների ներկայացուցիչների` հանրային և քաղաքական մասնակցությունը խթանելու կարևորությանը, կրթությունից դուրս մնալու և այլ խնդիրների։ Ընդգծել եմ, որ այս ոլորտում անհրաժեշտ է ոչ միայն դեպքերին արձագանքող, այլև իրավունքներն ակտիվորեն խթանող մոտեցում»,– գրել է ՀՀ ՄԻՊ-ը։
Հանդիպման ավարտին ձեռք է բերվել ոլորտային հարցերը հասցեավորելու պայմանավորվածություն։