3 րոպեի ընթերցում
Հայաստանի բանկերի վարկային պորտֆելը 2025 թվականին կազմել է շուրջ 7.9 տրլն դրամ, որի գերակշիռ մասը՝ 23.2 տոկոսը, սպառողական վարկերն են:
«Արմենպրես»-ի փոխանցմամբ՝ այս մասին նախորդ տարվա ցուցանիշների ամփոփմանը նվիրված ասուլիսում հայտարարեց Հայաստանի բանկերի միության նախագահ Դանիել Ազատյանը:
Նշվեց, որ 2025 թվականի դեկտեմբերի 31-ի դրությամբ Հայաստանի բանկերի վարկային պորտֆելը կազմել է 7 տրլն 870 մլրդ դրամ: Ամենամեծը սպառողական վարկերի ծավալն է՝ ընդհանուրի 23.2 տոկոսը կամ 1 տրլն 907 մլրդ 520 մլն դրամ:
Ծավալով երկրորդը հիփոթեքային վարկերն են՝ 21.3 տոկոս կամ 1 տրլն 665 մլրդ 545 մլն դրամ: Հաջորդ դիրքերում են շինարարության վարկերը՝ 859 մլրդ 952 մլն, սպասարկման և այլ ոլորտների վարկերը՝ 836 մլրդ 816 մլն, առևտրի ոլորտի համար վարկերը՝ 732 մլրդ 649 մլն, արդյունաբերության վարկավորումը՝ 728 մլրդ 301 մլն, գյուղատնտեսական վարկերը՝ 404 մլրդ 505 մլն դրամ: Մնացած բոլոր ոլորտների վարկավորման ընդհանուր ծավալը 9.9 տոկոս է:
Մեկամյա կտրվածքով (2024 թվականի համեմատ) վարկավորման աճի ամենամեծ ցուցանիշն ապահովել է շինարարությունը՝ 30.2 տոկոս: Սպառողական վարկերն ավելացել են 29.6, սպասարկման ոլորտի և այլ վարկերը՝ 28.4, արդյունաբերության ոլորտ ուղղված վարկերը՝ 25.2, գյուղատնտեսականը՝ 17.6, առևտրականը՝ 16.1, հիփոթեքայինը՝ 13.2 տոկոսով:
Ֆիզիկական անձանց տրամադրված վարկերի ծավալը նախորդ տարվա համեմատ նվազելով 2 տոկոսով՝ կազմել է 44 տոկոս: Փոխարենը 25 տոկոսով ավելացել է իրավաբանական անձանց վարկավորումը՝ 56 տոկոս:
Բանախոսի ներկայացմամբ՝ ՀՀ բանկային համակարգի ընդհանուր ակտիվները 2025 թվականի վերջի դրությամբ կազմել են 12 տրլն 830 մլրդ դրամ՝ ավելանալով շուրջ 1.8 տրլն դրամով կամ 16.6 տոկոսով:
Վարկային ներդրումներն ավելացել են գրեթե 1.5 տրլն դրամով կամ 23 տոկոսով՝ հասնելով 7.9 տրլն դրամի:
Հայաստանի բանկերի ընդհանուր կապիտալն ավելացել է շուրջ 400 մլրդ դրամով կամ 22.4 տոկոսով՝ կազմելով մոտ 2 տրլն 175 մլրդ դրամ:
2025 թվականին մոտ 1 տրլն դրամով կամ 15.5 տոկոսով աճել են ավանդները, որոնց ընդհանուր ծավալը 7.5 տրլն դրամ է: Ընդհանուր պարտավորություններն ավելացել են 1.4 տրլն դրամով:
Դանիել Ազատյանն արձանագրեց, որ վերջին 2-3 տարիներին նշված հիմնական ցուցանիշների աճի տեմպերն արագացել են: