Հունաստանի վարչապետը պաշտոնական այցով կմեկնի Թուրքիա

Հունաստանի վարչապետ Կիրիակոս Միցոտակիսը փետրվարի 11-ին  Ռեջեփ Թայիփ Էրդողանի հրավերով պաշտոնական այցով կմեկնի Թուրքիա:

Ինչպես հաղորդում է «Արմենպրես»-ը, այս մասին X սոցիալական ցանցի իր էջում գրել է Թուրքիայի նախագահի աշխատակազմի հաղորդակցության բաժնի ղեկավար Բուրհանեթթին Դուրանը:    

Նա  հայտնել է, որ Թուրքիա-Հունաստան բարձր մակարդակի համագործակցության խորհրդի վեցերորդ նիստը տեղի կունենա Անկարայում՝ Էրդողանի և Միցոտակիսի նախագահությամբ, որին կմասնակցեն երկու երկրների համապատասխան նախարարները:

Խորհուրդը կքննարկի Թուրքիա-Հունաստան հարաբերությունների բոլոր ասպեկտները և համագործակցության զարգացման ուղիները։   

Նշվում է, որ երկկողմ հարաբերություններից բացի, բանակցությունների ընթացքում նախատեսվում է մտքերի փոխանակում տարածաշրջանային և համաշխարհային զարգացումների վերաբերյալ:

Այցի ընթացքում նախատեսվում է նաև մի շարք փաստաթղթերի ստորագրում, որոնք ուղղված են երկկողմ հարաբերությունների ամրապնդմանը։