2 րոպեի ընթերցում
Գորիսում վիճաբանության ժամանակ նռնակ է պայթել, ինչի հետևանքով 2 մարդ մահացել է, մեկը՝ տեղափոխվել հիվանդանոց։ «Արմենպրես»-ի փոխանցմամբ՝ այս մասին հաղորդագրություն է տարածել ՀՀ ոստիկանությունը։
Ոստիկանության տարածած հաղորդագրության մեջ ընդգծվում է, որ ողբերգական դեպքի մասին ահազանգը ստացվել է հունվարի 25-ին ժամը 17.05-ին։
«Զանգահարած քաղաքացին հայտնել է, որ Գորիսի Թոզկապ կոչվող հատվածում` գերեզմանների մոտ, վիճաբանություն է եղել:
Նշված վայր են մեկնել ՆԳՆ ոստիկանության օպերատիվ խմբեր։ Պարզվել է, որ կենցաղային հարցերի շուրջ տեղի է ունեցել վիճաբանություն, ինչի ընթացքում 45-ամյա Վարուժան Յոլյանի ձեռքի նռնակը պայթել է: Վարուժան Յոլյանը և 38-ամյա Արմեն Յոլյանը մահացել են, իսկ վիճաբանությանը ներկա Գորիսի 30-ամյա բնակիչը ստացել է վնասվածքներ և տեղափոխվել բժշկական կենտրոն»,– նշված է հաղորդագրության մեջ։
Նախաձեռնվել է քրեական վարույթ, դեպքի բոլոր hանգամանքները պարզվում են։
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
Ավելի վաղ լրատվամիջոցները հայտնել էին, որ Գորիսում զինված միջադեպ է տեղի ունեցել, ինչի հետևանքով մահացել են Գորիսի համայնքապետ Առուշ Առուշանյանի վարորդը և վերջինիս ազգականը։ Ըստ շրջանառվող տեղեկությունների՝ տղամարդկանց միջև ծագած խնդիրն անձնական բնույթի է։