Կառավարությունը հաստատեց զբոսաշրջության զարգացման 2026-2030 թվականների ռազմավարական ծրագիրը
2 րոպեի ընթերցում
Հայաստանի կառավարությունը հավանության արժանացրեց զբոսաշրջության զարգացման 2026-2030 թվականների ռազմավարական ծրագիրը և ռազմավարական ծրագրի կատարումն ապահովող գործողությունների ծրագիրը, որի նպատակն է երկրի ենթակառուցվածքների և զբոսաշրջության մակարդակի բարձրացումը։
«Արմենպրես»-ի հաղորդմամբ՝ վերոնշյալ նախագիծն ընդունվեց Կառավարության հունվարի 8-ի հերթական նիստում։
Հիմնական զեկուցող, ՀՀ էկոնոմիկայի նախարար Գևորգ Պապոյանն իր խոսքում նշեց, որ ռազմավարական ծրագրի մշակման անհրաժեշտությունը բխում է առկա խնդիրներին համալիր լուծում տալու անհրաժեշտությունից։
«Ծրագրի նպատակը Հայաստանում զբոսաշրջային ամբողջ ենթակառուցվածքների և զբոսաշրջության մակարդակի բարձրացումն է։ Սա մեզ հնարավորություն է տալու, ի վերջո, 5 տարի հետո ունենալ ավելի շատ զբոսաշրջիկներ, ավելի լայն և դիվերսիֆիկացված շուկա, ինչի համար, իհարկե, անհրաժեշտ է, որ Հայաստանը դիրքավորենք որպես զբոսաշրջային խաչմերուկ, քանի որ մենք տեսնում ենք դրա հնարավորությունը՝ որպես գրավիչ, որակյալ, անվտանգ, խաղաղ զբոսաշրջային ուղղություն»,-ասաց Պապոյանը։
Նախարարի խոսքով՝ ծրագրով նախատեսված ռազմավարական զարգացման երեք հիմնական տեսակներն են մշակութայինը, գաստրոն և արկածայինը՝ ներառյալ ձմեռայինը։ Պապոյանի բնորոշմամբ՝ Հայաստանը տուրիզմի զարգացման համար շատ մեծ հնարավորություններ ունի նաև ագրոզբոսաշրջության ոլորտում։