2 րոպեի ընթերցում
Երևանում 2026 թվականի մայիսի 5-ին կանցկացվի Հայաստան-Եվրոպական միություն առաջին գագաթնաժողովը: «Արմենպրես»-ին արտաքին գործերի նախարարությունից հայտնեցին, որ գագաթնաժողովին մասնակցության համար Հայաստան կժամանեն Եվրոպական միության բարձրաստիճան պաշտոնյաները՝ Եվրոպական խորհրդի նախագահ Անտոնիու Կոշտան և Եվրահանձնաժողովի նախագահ Ուրսուլա ֆոն դեր Լայենը:
Հայաստանի արտաքին գործերի նախարար Արարատ Միրզոյանը դեկտեմբերի 2-ին Բրյուսելում կայացած մամուլի ասուլիսում հույս հայտնեց գագաթնաժողովի շրջանակում Երևանում տեսնել նաև ԵՄ արտաքին գործերի և անվտանգության քաղաքականության բարձր ներկայացուցիչ Կայա Կալասին և ԵՄ ընդլայնման հարցերով հանձնակատար Մարթա Կոսին:
Ինչպես ավելի վաղ հայտարարվել էր՝ 2026 թվականի մայիսի 4-ին էլ Երևանում կանցկացվի Եվրոպական քաղաքական համայնքի 8-րդ գագաթնաժողովը: Հիմնադրվելով 2022թ. այն միավորում է եվրոպական երկրների ղեկավարներին՝ քննարկելու ռազմավարական նշանակության թեմաներ՝ անվտանգության, էներգետիկայի, միգրացիայի, ենթակառուցվածքների, ժողովրդավարության և իրավունքի գերակայության հարցերում։ Այն նախաձեռնել է Ֆրանսիայի նախագահ Էմանուել Մակրոնը՝ նպատակ ունենալով ձևավորել երկխոսության ընդհանուր դաշտ ԵՄ անդամների և Եվրոպական հարևանության երկրների միջև։ ԵՔՀ առաջին գագաթնաժողովը տեղի է ունեցել 2022-ի հոկտեմբերին՝ Չեխիայում։ Հետագա գագաթնաժողովները կայացել են Մոլդովայում, Իսպանիայում, Միացյալ Թագավորությունում, Հունգարիայում, Ալբանիայում, Դանիայում: Հայաստանը կհյուրընկալի ութերորդը։