Ներառականության ապահովումը Հայաստանում գերակայություն է. ավելի քան 11 հազար երեխա մանկավարժահոգեբանական աջակցություն է ստացել
4 րոպեի ընթերցում
Հայաստանում տարածքային մանկավարժահոգեբանական աջակցության կենտրոններն այս տարվա ընթացքում աջակցություն են տրամադրել կրթության առանձնահատուկ պայմանների կարիք ունեցող շուրջ 9600 դպրոցականի, 1853 նախադպրոցական սանի և միջին մասնագիտական կրթության և ուսուցման հաստատությունների 91 սովորողի։
Կրթության առանձնահատուկ պայմանների կարիք ունեցող երեխաների աջակցությունը կազմակերպվում է երեք մակարդակով։ Առաջին մակարդակում՝ դպրոցում, նրանց աջակցում են ուսուցչի օգնականն ու հոգեբանը՝ ապահովելով անհատական մոտեցում։
Երկրորդ մակարդակում՝ տարածքային մանկավարժահոգեբանական աջակցության կենտրոնները գնահատում են կարիքները և կազմակերպում մասնագիտական ծառայություններ, իսկ երրորդ՝ հանրապետական մանկավարժահոգեբանական մակարդակում, իրականացվում են վերապատրաստումներ ու մեթոդական աջակցություն՝ համակարգի արդյունավետությունը բարձրացնելու համար։
«Արմենպրես»-ի թղթակցի հետ զրույցում Կրթության, գիտության, մշակույթի և սպորտի նախարարության հանրակրթության վարչության պետ Թամարա Սարգսյանը մանրամասնեց՝ կենտրոնների մասնագետները նաև խորհրդատվություն են տրամադրում ուսուցիչներին ու ծնողներին, կազմակերպում տեղեկատվական հանդիպումներ՝ նպաստելով ներառական կրթության որակի շարունակական բարձրացմանը։
«Մեր նպատակն է, որ յուրաքանչյուր երեխա ստանա աջակցված և մատչելի կրթություն։ Նախատեսվում է նաև կրթության կառավարման համակարգի մոդուլի մշակում և տարածքային մանկավարժահոգեբանական աջակցության կենտրոնների մասնագետների համար պլանշետների տրամադրում, ինչը կնպաստի գործընթացի արդյունավետությանը»,-ասաց պատասխանատուն։
Կրթության կառավարման տեղեկատվական համակարգի մոդուլի մշակման և Տարածքային մանկավարժահոգեբանական աջակցության կենտրոնների մասնագետների համար պլանշետների գնումը ֆինանսավորելու առաջարկը ներկայացվել է Տեղեկատվական համակարգերի կառավարման խորհուրդ և 2025 թվականի հունիսի 23-ին կայացած նիստում այն հավանություն է ստացել։
«Կրթության առանձնահատուկ պայմանների կարիք ունեցող, այդ թվում՝ հաշմանդամություն ունեցող երեխաների համար ուսումնական հաստատություններում ֆիզիկական միջավայրի մատչելիությունը ապահովելու և խելամիտ հարմարեցումները վերահսկելու նպատակով ձևավորվել է աշխատանքային խումբ։ «ՅՈՒՆԻՍԵՖ-ի հետ համագործակցությամբ մշակել ենք «Ուսումնական հաստատություններում ֆիզիկական միջավայրի մատչելիության ապահովում» գործիքակազմը, որը մշտադիտարկման համակարգի մի բաղադրիչն է, իսկ մյուս՝ «Սովորողներին խելամիտ հարմարեցումներով ապահովման» բաղադրիչի մշակումն ավարտին է հասցվել նոյեմբերի 30-ին»,-եզրափակեց Թամարա Սարգսյանը։
Կրթության առանձնահատուկ պայմանների կարիք ունեցող երեխաների համար դպրոցում ուսանելը դարձավ ավելի աջակցող ու մատչելի, երբ 2014 թվականին Հայաստանի Հանրապետության Ազգային ժողովը փոփոխություններ կատարեց «Հանրակրթության մասին» օրենքում, որի համաձայն՝ Հայաստանի կրթական համակարգը անցում կատարեց համընդհանուր ներառական կրթության: Այսինքն՝ բոլոր դպրոցներում ստեղծվեցին պայմաններ, որպեսզի կրթության առանձնահատուկ պայմանների կարիք ունեցող և հաշմանդամություն ունեցող երեխաները ուսանեն ընդհանուր կրթական միջավայրում՝ հավասար հնարավորություններով։
Լուսինե Ջալալյան