2 րոպեի ընթերցում
Երևանի «Նոա»-ի գլխավոր մարզիչ Սանդրո Պերկովիչի կարծիքով` Կոնֆերենցիաների լիգայի հիմնական փուլում շոտլանդական «Աբերդին»-ի դեմ խաղում երկու ակումբներն էլ ձգտելու են հաղթանակի:
«Կոնֆերենցիաների լիգան կարճ մրցաշար է և ունի միայն 6 մրցափուլ: Եվ թիմերի միջև 3 միավորների տարբերությունն ընդամենը մեկ մրցափուլի տարբերություն է: Սրանից ելնելով` «Նոա»-ի ու «Աբերդին»-ի միջև եղած 3 միավորի տարբերությունը շատ մեծ չէ»,- «Արմենպրես»-ի հաղորդմամբ` լրագրողների հետ նախախաղային ասուլիսի ժամանակ ասաց Պերկովիչը:
Վերջինիս խոսքով` Կոնֆերենցիաների լիգայի մասնակից ոչ մի թիմ, մրցելով շոտլանդական այդ մարզադաշտում, չի կարող ֆավորիտ համարվել:
«Մենք մրցելու ենք բացառապես հաղթանակի համար: «Աբերդին»-ը ուժեղ ակումբ է, որն ունի բարձր որակ ունեցող ֆուտբոլիստներ: Եվ մարզիչն էլ բավականին լավ աշխատանք է կատարում թիմի հետ: Բայց լիահույս եմ, որ առաջիկա խաղում կկարողանանք լավագույնս ներկայացնել «Նոա»-ն ու հայկական ֆուտբոլը»,-ասաց նա:
Ֆուտբոլի Կոնֆերենցիաների լիգայի հիմնական փուլի հերթական տուրում «Նոա»-ն նոյեմբերի 27-ին արտագնա խաղում կմրցի շոտլանդական «Աբերդին»-ի հետ: Այդ հանդիպումը կմեկնարկի Երևանի ժամանակով կեսգիշերին: