Լեգիտիմության վրա հիմնվելով կարող ենք զարգացնել բանակը և ձեռք բերել սպառազինություն. վարչապետ
2 րոպեի ընթերցում
Հայաստանի անվտանգության հիմնական երաշխիքը լեգիտիմությունն է և հենց լեգիտիմության հիմքի վրա է, որ Հայաստանը կարող է զարգացնել իր բանակը, ձեռք բերել անհրաժեշտ սպառազինություն և մշակել ռազմատեխնիկական համագործակցություններ։ «Արմենպրես»-ի հաղորդմամբ՝ այս մասին ասել է ՀՀ վարչապետ Նիկոլ Փաշինյանը «Ֆեյսբուք»-ի իր էջում հրապարակած տեսանյութում։
Պատասխանելով այն հարցին, թե ինչպե՞ս են պատրաստվում կառավարել մեր երկրի անվտանգային սպառնալիքները, վարչապետը ընդգծել է, որ պատասխանը լեգիտիմությունն է։
«Լեգիտիմությունը մեր միջազգայնորեն ճանաչված 29743 քկմ Հայաստանի Հանրապետության ինքնիշխան տարածքի վրա հիմնված քաղաքականությունների վարումն է։
Մենք, ի տարբերություն նախկինի, որևէ սահմանափակում չունենք աշխարհի որևէ գործընկերոջ հետ որևէ տեսակի ռազմատեխնիկական համագործակցություն սահմանելու և աշխատելու՝ նկատի ունեմ զենք զինամթերք ձեռք բերելու, ըստ անհրաժեշտության, ինչը այսօր գործնականում տեղի է ունեցել»,-ընդգծել է նա։
Նրա խոսքով՝ Իրական Հայաստանի գաղափարախոսության շնորհիվ երկրները հերթով Հայաստանի հետ սպառազինության և ռազմական տեխնիկայի շուրջ համագործակցության սահմանափակումները հերթով հանում են։
Վարչապետն ընդգծել է նաև, որ սա պատերազմի համար չէ, այլ խաղաղության համար՝ պարզաբանելով, որ լեգիտիմությունը պետք է ծառայեցնի Հայաստանի անվտանգության, տարածքային ամբողջականության ու ինքնիշխանության ապահովմանը երկարաժամկետ կտրվածքով։
«Այս լեգիտիմության հիմքի վրա մենք կարող ենք զարգացնել մեր բանակը, ձեռք բերել սպառազինություն, ռազմական տեխնիկա, իրականացնել բարեփոխումներ միջազգային գործընկերների հետ, ինչը և անում ենք»,-եզրափակել է Փաշինյանը։