1 րոպեի ընթերցում
Եվրամիությունը և Գիտության բաց հասանելիության կենտրոնը (COAS) համատեղ պատրաստվում են գիտահետազոտական երկու ինստիտուտ հիմնել Սյունիքում։
«Արմենպրես»-ի փոխանցմամբ՝ Հայաստանում Եվրամիության առաքելության ղեկավար Վասիլիս Մարագոսն այս մասին հայտարարեց Երևանում հոկտեմբերի 22-ին կայացած ԵՄ «Հորիզոն Եվրոպա» ծրագրի տեղեկատվական միջոցառման ընթացքում:
«COAS-ի հետ պատրաստվում ենք երկու գիտահետազոտական ինստիտուտ բացել Սյունիքում։ Սյունիքն այն մարզերից է, որին մեծ ուշադրություն ենք դարձնում։ Կզարգացնենք նաև նոր ձեռնարկությունները և ենթակառուցվածքը։ Անցած շաբաթ Սյունիքում գործարկեցինք ոռոգման համակարգեր, արևային մարտկոցներ, բազմաթիվ ծրագրեր: Սա համընդհանուր ջանքերի մի մասն է, որը մենք գործադրում ենք ձեր երկրի ամրացման, Հայաստանի դիմակայունության, մրցունակության բարձրացման համար: Նաև ակնկալում եմ Հայաստանի ավելի ակտիվ մասնակցությունը Եվրոպական Ինովացիոն խորհրդի նախագծերին»,- նշեց Վասիլիս Մարագոսը:
Նա կարևորեց նաև Հարավային Կովկասում հաղորդակցության ուղիների ապաշրջափակումը՝ ընդգծելով, որ դա կնպաստի նոր ներուժի ստեղծմանը։