2 րոպեի ընթերցում
Մինչև 2019 թվականի հունիսի 29-ը ֆիզիկական անձանց կողմից մարդատար տաքսիներով ուղևորափոխադրումների համար կուտակված պետական տուրքերը և դրանց հաշվարկված տույժերը ենթակա են համաներման։ «Արմենպրես»-ի հաղորդմամբ՝ ազգային ժողովում համապատասխան նախագիծը ներկայացրեց ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը։
Նա նշեց, որ «Պետական տուրքի մասին» օրենքի նախկին խմբագրությամբ ֆիզիկական անձանց համար սահմանված էին պետական տուրքի դրույքաչափեր՝ ամսական, եռամսյակային և տարեկան ձևաչափերով։
«Նշված ժամանակահատվածում ավելի քան 5000 ֆիզիկական անձանց մոտ կուտակվել են պետական տուրքի պարտավորություններ, որոնց ընդհանուր գումարը կազմում է շուրջ 1,3 միլիարդ դրամ, որից մոտ 900 միլիոնը՝ տուրքեր, իսկ 400 միլիոնը՝ տույժեր։ Նախագծով առաջարկվում է մինչև 2019 թվականի հունիսի 29-ը ձևավորված պարտավորությունների գծով ֆիզիկական անձանց ազատել տուրքի և հաշվարկված տույժերի վճարումից»,– նշեց Սիմոնյանը։
Նրա խոսքով՝ փոփոխությունը պայմանավորված է այն հանգամանքով, որ 2019 թվականի հունիսից ուժը կորցրել են տաքսի ծառայությունների լիցենզավորման պետական տուրքի նորմերը, իսկ 2024 թվականից արդեն ուժի մեջ են նոր կարգավորումներ, որոնք նախատեսում են հարկային և վերահսկողական նոր մեխանիզմներ։
«Ներկայումս տաքսի ծառայությունների մեծ մասը գործում է էլեկտրոնային հարթակների միջոցով, և պետական տուրքը հաշվարկվում ու գանձվում է յուրաքանչյուր պատվերի արժեքից՝ 1,5-ից մինչև 5 տոկոս չափով»,– ասաց փոխնախարարը։