368.59
Սարկոզին ժամանել է բանտ՝ սկսելով 5-ամյա ազատազրկման ժամկետը
2 րոպեի ընթերցում
Ֆրանսիայի նախկին նախագահ Նիկոլա Սարկոզին ժամանել է Փարիզի «Լա Սանտե» բանտ, որտեղ պետք է անցկացնի 5 տարի. նա ազատազրկման է դատապարտվել իր քարոզարշավի համար Լիբիայից գումար ներգրավելու համար։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Նախկին նախագահը տնից դուրս է եկել կնոջ՝ Կառլա Բրունիի հետ միասին։ Նրան ողջունել է աջակիցների բազմությունը, որոնք վանկարկել են «Նիկոլա» և երգել Ֆրանսիայի ազգային օրհներգը։
Սարկոզիի նկատմամբ դատավճիռը հայտնել են սեպտեմբերին։
«Ես ցանկանում եմ ասել, որ այս առավոտյան բանտարկվում է ոչ թե Հանրապետության նախկին նախագահը, այլ անմեղ մի մարդ», - հայտարարել է Սարկոզին։
Սարկոզիի դատավճիռը կայացվել է տարիներ տևած դատական գործընթացից հետո՝ կապված մեղադրանքների հետ, որ 2007 թվականին նա միլիոնավոր դոլար կանխիկ գումար է վերցրել Լիբիայի ղեկավար Մուամմար Քադաֆիից՝ իր նախագահական ընտրարշավը ֆինանսավորելու համար։
Սարկոզին մեղավոր է ճանաչվել մտերիմ օգնականների հետ դավադրություն կազմակերպելու համար, սակայն նրան արդարացրել են միջոցներն անձամբ ստանալու կամ օգտագործելու գործով։
Նախկին նախագահը հետևողականորեն հերքել է իր մեղքը և գործը որակել է քաղաքական դրդապատճառներ ունեցող։
Բաժանորդագրվեք մեր ալիքին Telegram-ում