3 րոպեի ընթերցում
Հայաստանի Հանրապետության շրջակա միջավայրի նախարար Համբարձում Մաթևոսյանը հանդիպում է ունեցել Հայաստանում Չեխիայի Հանրապետության արտակարգ և լիազոր դեսպան Պետր Պիրունչիկի հետ:
«Արմենպրես»-ի փոխանցմամբ՝ հանդիպման մասին նախարարը գրել է «Ֆեյսբուք»-ի իր էջում՝ նշելով, որ քննարկել են բնապահպանական ոլորտին վերաբերող մի շարք կարևոր հարցեր։
«Անդրադարձանք Շրջակա միջավայրի նախարարության համակարգմամբ և Եվրոպական միության ֆինանսավորմամբ իրականացվող «Հայաստանում կենսաբազմազանության ուժեղացված պահպանությունն ու կայուն օգտագործումը եվրոպական չափանիշներին համապատասխան» երկամյա Twinning ծրագրին, որը համատեղ իրականացվել է Չեխիայի և Ֆինլանդիայի Հանրապետությունների կողմից։
Նշեցի, որ ծրագիրը նշանակալի ներդրում է Հայաստանի բնապահպանական կառավարման համակարգի կատարելագործման գործում՝ հատկապես կենսաբազմազանության պահպանության և հատուկ պահպանվող տարածքների արդյունավետ կառավարման ուղղությամբ։ Տվյալ ծրագրի շրջանակում մշակված նոր օրենսդրական մոտեցումները և կառավարման մեխանիզմները կնպաստեն ՀՀ–ԵՄ Համապարփակ և ընդլայնված գործընկերության համաձայնագրով (CEPA) ստանձնած պարտավորությունների արդյունավետ իրականացմանը»,- մանրամասնել է Համբարձում Մաթևոսյանը:
Զրույցի ընթացքում քննարկվել են նաև ծրագրի շարունակականության ապահովման և ապագա համագործակցության խորացման հնարավորությունները։ Այս համատեքստում անդրադարձ է կատարվել Կենսաբազմազանության մասին կոնվենցիայի կողմերի 17-րդ համաժողովի (#CoP17) շրջանակում համագործակցության և համատեղ նախաձեռնությունների հարցերին։
Դեսպան Պիրունչիկը վերահաստատել է Չեխիայի Հանրապետության պատրաստակամությունը՝ շարունակել աջակցությունը Հայաստանի բնապահպանական բարեփոխումներին՝ հատկապես ԵՄ չափանիշների ներդրման և կայուն զարգացման սկզբունքների կիրառման ուղղությամբ։
Քննարկվել են նաև հասարակական կազմակերպությունների և մասնավոր հատվածի ներգրավման ձևաչափերը՝ բնապահպանական քաղաքականության արդյունավետ իրականացման, հանրային իրազեկման և մասնակցային կառավարման համակարգի ամրապնդման նպատակով։
«Համոզված եմ, որ մեր երկկողմ համագործակցությունը կնպաստի Հայաստանի բնապահպանական ոլորտի ինստիտուցիոնալ զարգացմանը, միջազգային լավագույն փորձի փոխանակմանը և նոր նախաձեռնությունների իրականացմանը՝ ի շահ շրջակա միջավայրի պահպանության և կայուն զարգացման նպատակների առաջմղման»,- գրառումը եզրափակել է ՀՀ ՇՄ նախարարը: