«Նոա»-ն 688 մլն դրամով ձեռք է բերել մարզադաշտի ու ենթակառուցվածքների հողատարածքը և 312 միլիոն դրամ նվիրաբերել Վաղարշապատ համայնքին
2 րոպեի ընթերցում
Հայաստանի ֆուտբոլի առաջնության գործող չեմպիոն Երևանի «Նոա» ֆուտբոլային ակումբը 688 մլն դրամով ձեռք է բերել մարզադաշտի ու ենթակառուցվածքների հողատարածքը և 312 միլիոն դրամ նվիրաբերել Վաղարշապատ համայնքին:
«Արմենպրես»-ի հաղորդմամբ` այս մասին հայտնում է ակումբի մամուլի ծառայությունը:
Ավելի վաղ ՀՀ կառավարությունը հավանություն էր տվել «Նոա» ֆուտբոլային ակումբի ներկայացրած Վաղարշապատի մարզադաշտի և ֆուտբոլային ակադեմիայի ենթակառուցվածքների զարգացման ներդրումային ծրագրին։ Վաղարշապատ համայնքի ավագանու հաստատումից հետո իրականացվել է 23.8 հա մակերեսով հողատարածքի առքուվաճառքը համայնքի և «Նոա» ՖԱ-ի միջև։
«Նոա»-ն հողատարածքի դիմաց վճարել է շուրջ 688 մլն դրամ։ Հոկտեմբերի 20-ին «Նոա» ՖԱ-ի և համայնքի միջև կնքվել է նվիրատվության պայմանագիր, որն օգտագործվելու է համայնքային ենթակառուցվածքների զարգացման նպատակով: Պայմանագրով «Նոա» ՖԱ-ն մոտ 312 մլն դրամ է նվիրաբերում Վաղարշապատ համայնքին։ Այսպիսով՝ «Նոա»-ն ընդհանուր 1 միլիարդ դրամ է վճարել Վաղարշապատ համայնքին։
«Նոա» ՖԱ-ի նախագահ Վարդգես Վարդանյանը հողատարածքի ձեռքբերումից հետո նշել է. «Սա հաջորդ քայլն է դեպի մեր երազանքը։ Մենք մեր բոլոր քայլերի մասին կիսվելու ենք ֆուտբոլային հանրության հետ։ Շնորհակալ ենք Վաղարշապատ համայնքին սերտ աշխատանքի համար։ Առա՜ջ դեպի մեր նոր նպատակներ»: