1 րոպեի ընթերցում
Բոլիվիայում համատեղության կարգով ՀՀ դեսպան Մարիամ Գևորգյանն (նստավայրը՝ Մոնտեվիդեո) իր հավատարմագրերն է հանձնել Բոլիվիայի Բազմազգ Պետության նախագահ Լուիս Ալբերտո Արսե Կատակորային:
«Արմենպրես»-ի փոխանցմամբ՝ Հայաստանի արտաքին գործերի նախարարությունից հայտնում են, որ հավատարմագրերի հանձնման պաշտոնական արարողությունից հետո ՀՀ դեսպանը առանձնազրույց է ունեցել Բոլիվիայի նախագահի հետ, որին ներկա է գտնվել նաև Արտաքին հարաբերությունների նախարար Սելինդա Սոսա Լունդան:
Նախագահ Արսե Կատակորան շնորհավորել է ՀՀ դեսպանին նշանակվելու առթիվ՝ հավելելով, որ դեսպանի հավատարմագրումը նոր էջ է բացում երկկողմ հարաբերություններում:
Դեսպան Գևորգյանը շնորհակալություն է հայտնել շնորհավորանքների համար և հավաստիացրել, որ իր առաքելության ընթացքում առավելագույն ջանքեր կներդնի երկու պետությունների միջև հարաբերությունների զարգացման և փոխադարձ հետաքրքրություն ներկայացնող ոլորտներում համագործակցությունն ամրապնդելու ուղղությամբ։