3 րոպեի ընթերցում
Հայաստանում հոկտեմբերի 9-12-ը կայացել է «Էրազմուս» ուսանողական ցանցի Հարավարևելյան եվրոպական համաժողովը (SEEP Yerevan 2025)։ «Արմենպրես»-ի փոխանցմամբ՝ ամենամյա այս համաժողովը Երևանում միավորեց 16 երկրից ավելի քան 140 երիտասարդ կամավորների Հայաստանի, տարածաշրջանի և Եվրոպայի տարբեր երկրներից։ Չորս օրերի ընթացքում անցկացվեցին նիստեր, աշխատաժողովներ և փորձի փոխանակման քննարկումներ։
Միջոցառումը հյուրընկալող «Էրազմուս» ուսանողական ցանց (ESN Armenia) Երևան երիտասարդական ՀԿ-ի նախագահ Հովհաննես Յուքինյանի խոսքով՝ համաժողովը հիանալի հնարավորություն էր՝ Հայաստանը ներկայացնելու որպես կրթության և երիտասարդության հզորացման կենտրոն։
«Միջոցառումը հնարավորություն է ընձեռում Հայաստանում կրթության միջազգայնացման և տարածաշրջանում նոր համագործակցություններ ստեղծելու համար։ Հույս ունենք, որ մեր աշխատանքով ներդրում ենք ունենում Հայաստանը աշխարհի քարտեզում որպես կրթական կենտրոն ամրապնդելու հարցում»,– ասաց նա։
«SEEP Yerevan 2025»-ի օրակարգում կենտրոնական տեղ էին զբաղեցնում կրթության միջազգայնացումը, միջմշակութային երկխոսությունը և երիտասարդների սոցիալական ներգրավվածությունը։
«SEEP-ը բացառիկ հարթակ է, որտեղ տարբեր երկրներից կամավորները միավորվում են մեկ նպատակով՝ զարգանալ և կիսվել փորձով: Այստեղ մենք կառուցում ենք ընկերության կամուրջներ, որոնք անցնում են սահմաններից այն կողմ։ Միջոցառումը ոչ միայն ծանոթությունների, այլև ինքնազարգացման հիանալի հնարավորություն է։ Այդ հմտությունները օգտակար են ոչ միայն ESN-ի շրջանակում, այլև անձնական կյանքում։ Բոլորս տարբեր ենք, բայց նպատակը նույնն է՝ խթանել միջազգային կրթությունը և ձևավորել միջմշակութային գիտակցություն»,- նշեց ESN Հարավարևելյան եվրոպական տարածաշրջանի համակարգող Իքսան Կուրտամետը։
Իքսան Կուրտամետը տպավորված է ինչպես Հայաստանի գեղեցկությամբ, այնպես էլ մարդկանց վերաբերմունքով։
«Հարավարևելյան Եվրոպայի և Կովկասի երկրները տարբեր են, բայց, միաժամանակ, շատ նման՝ նույն ջերմությամբ ու հյուրընկալությամբ։ Երևանը հին, հպարտ ու շատ ջերմ մարդկանց քաղաք է»,– եզրափակեց նա։