Վիեննայում ՄԱԿ-ի կենտրոնակայանում կայացել է «Վիեննայի դիվանագիտական գավաթ» արագ շախմատի 3-րդ մրցաշարը
2 րոպեի ընթերցում
Վիեննայում Միավորված ազգերի կազմակերպության կենտրոնակայանում Հայաստանի մշտական ներկայացուցչության նախաձեռնությամբ և Ավստրիայի շախմատի ֆեդերացիայի հետ համագործակցությամբ կայացել է «Վիեննայի դիվանագիտական գավաթ» արագ շախմատի ավանդական 3-րդ մրցաշարը:
«Արմենպրես»-ի փոխանցմամբ՝ այս մասին հաղորդագրություն է տարածել Ավստրիայում Հայաստանի դեսպանությունը։
Մրցաշարին մասնակցում էին դեսպաններ, դիվանագետներ, Ավստրիայի գերատեսչությունների, միջազգային կազմակերպությունների քարտուղարությունների շուրջ յոթ տասնյակ ներկայացուցիչներ և նրանց ընտանիքի անդամները:
Միջոցառմանը բացման խոսքով հանդես եկան Ավստրիայում ՀՀ դեսպան և մշտական ներկայացուցիչ Անդրանիկ Հովհաննիսյանը, Վիեննայի ՄԱԿ-ի գրասենյակի գլխավոր տնօրենի տեղակալ Չայա Կապիլաշրամին և Ավստրիայի շախմատի ֆեդերացիայի նախագահ Միխայել Շտյոտինգերը:
Դեսպան Անդրանիկ Հովհաննիսյանն իր ելույթում մասնավորապես ընդգծել է, որ շախմատը միջազգային համերաշխության հզոր խորհրդանիշ է, որը միավորում է մարդկանց ազնիվ խաղի շուրջ։ Ինչպես ՄԱԿ-ի առաքելությունը, այն ևս խարսխված է փոխադարձ հարգանքի ու հանդուրժողականության գաղափարների վրա:
Դեսպանը Հովհաննիսյանն անդրադարձել է շախմատի առանձնահատուկ նշանակությանը Հայաստանի համար՝ ներկայացնելով երկրի ձեռքբերումները և համաշխարհային շախմատային համայնքին ունեցած ներդրումը։
2019թ. դեկտեմբերի 12-ին ՄԱԿ-ի Գլխավոր ասամբլեան միաձայն ընդունել է Հայաստանի կողմից նախաձեռնված «Շախմատի համաշխարհային օր» խորագրով 74/22 բանաձևը, որը ճանաչել է խաղի կարևոր դերը միջազգային երկխոսության, հանդուրժողականության և փոխըմբռնման խթանման գործում։ Բանաձևը, որը համահեղինակել են ՄԱԿ 53 անդամ պետություններ, ընդգծում է շախմատի ընձեռած հնարավորությունները կրթության զարգացման, կանանց կարողությունների ամրապնդման, ներառականության, փոխըմբռնման և համընդհանուր հարգանքին նպաստելու գործում:
Վիեննայի դիվանագիտական շախմատի մրցաշարը անցկացվում է երրորդ տարին անընդմեջ՝ Հայաստանի մշտական ներկայացուցչության և Ավստրիայի շախմատի ֆեդերացիայի համատեղ ջանքերով: