Փաշինյանը ներկայացրել է, թե ինչով է Չորրորդ Հանրապետությունը տարբերվելու Երրորդ Հանրապետությունից
2 րոպեի ընթերցում
«Քաղաքացիական պայմանագիր» կուսակցության 7-րդ համաժողովի ընթացքում Հայաստանի վարչապետ Նիկոլ Փաշինյանը հայտարարել էր, որ իշխող կուսակցությունը Հայաստանի Չորրորդ Հանրապետության հաստատումը հռչակում է որպես առաջիկա ռազմավարական անելիք։ Չորրորդ Հանրապետության հաստատումը՝ որպես նպատակ, արտացոլվել է համաժողովի ընթացքում կուսակցության ընդունած հռչակագրում։
«Արմենպրես»-ի փոխանցմամբ՝ վարչապետ Նիկոլ Փաշինյանը քիչ առաջ «Ֆեյսբուք»-ի իր էջում հրապարակած տեսանյութում պարզաբանել է, թե ինչով է Չորրորդ Հանրապետությունը տարբերվելու Երրորդ Հանրապետությունից։
«Շատերը հարցնում են, թե ինչ տարբերություն Երրորդ Հանրապետության և Չորրորդ Հանրապետության միջև։ Իսկ տարբերությունը հետևյալն է. Երրորդ Հանրապետությունը հիմնվել է կոնֆլիկտի տրամաբանության վրա, Չորրորդ Հանրապետությունը հիմնվում է խաղաղության տրամաբանության վրա։ Երրորդ Հանրապետությունում Սահմանադրության՝ ժողովրդի ազատ կամարտահայտմամբ և քվեարկությամբ ընդունված լինելը խիստ կասկածելի է, իսկ Չորրորդ Հանրապետությունում նման կասկած ընդհանրապես պետք է չլինի։ Երրորդ Հանրապետությունում իշխանության՝ ժողովրդին պատկանելը հարաբերական է և ֆորմալ, Չորրորդ Հանրապետությունում դա պետք է լինի հստակ և անառարկելի։ Եվ, ի վերջո, Երրորդ Հանրապետությունը հայրենիքի մասին երազելու, հայրենիք փնտրելու, երազանքի հայրենիք փնտրելու մասին է, իսկ Չորրորդ Հանրապետությունն այն մասին է, որ Հայաստանի Հանրապետությունը մեր երազանքների հայրենիքն է և հայրենիք փնտրելու կարիք չկա»,- մանրամասնել է Փաշինյանը։