ՔՈԱՖ-ը գալիս է Սյունիք. Հովնանյան հիմնադրամի աջակցությամբ մեկնարկում է անգլերենի ուսուցիչների մենթորության ծրագիր

«Հայաստանի մանուկներ» հիմնադրամը (ՔՈԱՖ) ընդլայնում է համայնքների զարգացմանն ուղղված ծրագրերի աշխարհագրությունը՝ հայտարարելով իր գործունեության մեկնարկը Սյունիքի մարզում։

«Արմենպրես»-ի փոխանցմամբ՝ այս մասին հաղորդագրություն է տարածել «Հայաստանի մանուկներ» հիմնադրամը։ 

Հ. Հովնանյան ընտանեկան հիմնադրամի կողմից տրամադրված 80,000 ԱՄՆ դոլար աջակցության շնորհիվ ՔՈԱՖ-ը Սյունիքում սկսում է իր առաջին կրթական նախաձեռնությունը՝ «Անգլերենի ուսուցիչների հզորացում․ մենթորության ծրագիր»-ը։ Այն իրականացվելու է Գորիսի ու հարակից բնակավայրերի անգլերենի ուսուցիչների համար 2025 թվականի սեպտեմբերից մինչև 2026 թվականի հունիս։ 

Մենթորության այս ծրագիրը Սյունիքում ՔՈԱՖ-ի ներկայության կարևոր սկիզբ է. առաջիկա տարիներին հիմնադրամը, ՀՀ Կառավարության և ԵՄ աջակցությամբ, երկու նոր ՍՄԱՐԹ կենտրոն կբացի Գորիս ու Կապան քաղաքներում։

Կրթական ներուժի ամրապնդում Սյունիքում

Այս նախաձեռնության միջոցով ՔՈԱՖ-ը նպատակ ունի լրացնելու ուսուցիչների վերապատրաստման կարևոր բացերը և աջակցելու կրթական նոր չափորոշիչների ներդրմանը։ Հիմնվելով ավելի քան 20-ամյա փորձի վրա՝ ՔՈԱՖ-ը վերջին տարիներին մշակել է անգլերենի դասագրքեր յոթ տարբեր դասարանների համար, որոնք հաղթել են ԿԳՄՍ նախարարության բաց մրցույթում և երաշխավորվել հանրակրթական դպրոցներում կիրառության համար։ Այսօր հանրապետության ավելի քան 600 դպրոցում անգլերեն դասավանդվում է  ՔՈԱՖ-ի ստեղծած դասագրքերով։

Նոր ծրագիրը կներառի․

●        անգլերենի եռամսյա արագացված դասընթաց ուսուցիչների համար,

●        յոթ մենթորի վերապատրաստում Հայաստանի ամերիկյան համալսարանի դասախոսական կազմի կողմից,

●        մենթոր–մենթի համագործակցություն՝ ներառյալ դասալսումներ, քննարկումներ և համատեղ դասավանդում,

●        ամփոփիչ համաժողով, որի ընթացքում ուսուցիչները կներկայացնեն ծրագրի ընթացաքում իրենց ունեցած ձեռքբերումները, կկիսվեն փորձով և նորարարական մեթոդներով։

Ծրագիրը կխթանի հանրակրթական դպրոցների 14 ուսուցչի մասնագիտական կարողությունների զարգացումը՝ ուղղակիորեն ազդելով նաև հարյուրավոր աշակերտների ուսումնառության որակի բարձրացմանը։ Նրանց մեծ մասն, ի դեպ, արդեն իսկ կիրառում է ՔՈԱՖ-ի անգլերենի դասագրքերը։

Գործընկերություն՝ իրական արդյունքով

«Հովնանյան հիմնադրամի աջակցությամբ մենք հնարավորություն ունենք մեր հաջողված անգլերենի ծրագրերը բերելու Հայաստանի նոր մարզ՝ միաժամանակ ամրապնդելով ուսուցիչների մասնագիտական կարողությունները և ստեղծելով ավելի լայն ուսումնական հնարավորություններ աշակերտների համար»,– նշել է ՔՈԱՖ գործադիր տնօրեն Լիանա Ղալթաղչյանը։ «Սա մեր առաջին քայլն է Սյունիքում և կարևոր նախադրյալ այն լայնածավալ փոփոխությունների, որոնք սպասվում են առաջիկա տարիներին»։

ՍՄԱՐԹ Սյունիք. կրթության ու ստեղծարարության նոր կենտրոններ
ՔՈԱՖ-ը նախատեսում է այս ծրագրին զուգահեռ Սյունիքում հանդես գալ նոր ձեռնարկներով, որոնք միասին կծառայեն որպես կամուրջ տարածաշրջանում ավելի լայնածավալ նախաձեռնությունների իրականացման ուղղությամբ։ Եվրամիության հովանավորությամբ և ՀՀ կառավարության աջակցությամբ ՔՈԱՖ-ը երկու նոր ՍՄԱՐԹ կենտրոն կբացի Գորիս և Կապան քաղաքներում։ Այս նորարարական կենտրոնները կդառնան համաշխարհային մակարդակի արտադպրոցական կրթության, ստեղծարար ծրագրերի և համայնքային ներգրավվածության հարթակներ՝ Հայաստանի հարավային գյուղերը կապելով ավելի լայն հնարավորությունների հետ։

«Հայաստանի մանուկներ» բարեգործական հիմնադրամի մասին

«Հայաստանի մանուկներ» բարեգործական հիմնադրամի նպատակն է բարձրացնել Հայաստանի գյուղական բնակչության կյանքի որակը՝ կենտրոնանալով մասնավորապես երեխաներին և երիտասարդներին վերաբերող ծրագրերի ու կարիքների վրա: ՔՈԱՖ-ի զարգացման թիրախային ոլորտներն են կրթությունը, առողջապահությունը, ինչպես նաև սոցիալական և տնտեսական զարգացումը: ՔՈԱՖ-ը մեկնարկել է իր ծրագրերը 2004թ.-ին՝ սկսելով մեկ գյուղից և ընդլայնվելով Հայաստանում ու Արցախում՝ 82+ համայնքներում՝ ներդնելով ավելի քան 70 մլն ԱՄՆ դոլար՝ 100,000-ից ավել գյուղաբնակ շահառուների համար: