Կառավարությունը հաստատեց 2026 թվականի պետական բյուջեի նախագիծը. նշվեցին առանցքային թիրախները
2 րոպեի ընթերցում
Կառավարությունը սեպտեմբերի 25-ի նիստում հաստատեց «Հայաստանի Հանրապետության 2026 թվականի պետական բյուջեի մասին» օրենքի նախագիծը։ «Արմենպրես»-ի հաղորդմամբ՝ Ֆինանսների նախարար Վահե Հովհաննիսյանը նշեց, որ բյուջեն համահունչ է Կառավարության ծրագրի առաջնահերթություններին և ներառում է սոցիալական, կրթական, առողջապահական, տնտեսական և ենթակառուցվածքային կարևոր նախաձեռնություններ։
Նախարարը ներկայացրեց 2026 թվականի մի շարք առանցքային թիրախները.
Առողջապահություն. կգործարկվի համապարփակ առողջապահական ապահովագրության համակարգ
Կրթություն. «Ակադեմիական քաղաք» ծրագրի համար նախատեսվել է 4.9 միլիարդ դրամ՝ նախագծման, կառուցման և միջազգային խորհրդատվական ծառայությունների համար,
Աշխատավարձեր. ուսուցիչների և մանկավարժական աշխատողների աշխատավարձերը կբարձրանան ատեստավորման արդյունքում
Կրթական ենթակառուցվածքներ. կշարունակվի դպրոցների և մանկապարտեզների կառուցումը, հիմնանորոգումը և անհրաժեշտ սարքավորումներով հագեցումը
Ճանապարհային ենթակառուցվածքներ. միջպետական, հանրապետական և մարզային նշանակության ճանապարհների ու տրանսպորտային օբյեկտների նորոգման և պահպանման համար նախատեսվում է 66.2 միլիարդ դրամ
Ջրային տնտեսություն. կշարունակվեն ջրամբարաշինության ծրագրերը՝ ջրային ռեսուրսների ավելացման և հոսքերի կառավարման արդյունավետության բարձրացման նպատակով։
Հովհաննիսյանը նշեց, որ այս միջոցառումները միտված են տնտեսական աճին, սոցիալական բարելավումներին և ենթակառուցվածքային զարգացմանը։