2 րոպեի ընթերցում
ԿԳՄՍ նախարարի տեղակալ Արաքսիա Սվաջյանը Թբիլիսիի N104 դպրոցում ներկա է եղել «Արմաթ» ճարտարագիտական աշխատանոցի բացմանը:
«Արմենպրես»-ի փոխանցմամբ, այս մասին հայտնում են ՀՀ ԿԳՄՍ նախարարությունից՝ նշելով, որ սա Վրաստանի մայրաքաղաքում բացված առաջին «Արմաթ» աշխատանոցն է: Մինչ այդ Վրաստանի այլ բնակավայրերի դպրոցներում արդեն գործում էին 11 «Արմաթ» աշխատանոցներ:
Նախարարությունից նշում են, որ միջոցառմանը մասնակցել են Վրաստանի կրթության, գիտության և երիտասարդության նախարարի տեղակալ Բաիա Կվիցիանին, Վրաստանում ՀՀ դեսպան Աշոտ Սմբատյանը և լաբորատորիայի հիմնադիր, Առաջատար տեխնոլոգիաների ձեռնարկությունների միության գործադիր տնօրեն Սարգիս Կարապետյանը։
Ողջունելով ներկաներին՝ ԿԳՄՍ նախարարի տեղակալ Արաքսիա Սվաջյանը կարևորել է ժամանակակից տեխնոլոգիաների տիրապետման անհրաժեշտությունը և այս համատեքստում ընդգծել «Արմաթի» կարևոր դերակատարությունը:
2011 թվականից ներդրված «Արմաթ» ճարտարագիտական ոչ ֆորմալ կրթական ծրագիրն իրականացվում է ՀՀ ԿԳՄՍՆ օժանդակությամբ՝ ԱՏՁՄ-ի հետ համագործակցությամբ:
Ներկայում ՀՀ հանրակրթական դպրոցներում գործում են շուրջ 630 «Արմաթ» ճարտարագիտական աշխատանոցներ՝ հասանելիություն ապահովելով ՀՀ յուրաքանչյուր երկրորդ դպրոցում։ «Արմաթի» աշխարհագրությունը տարեցտարի ընդլայնվում է. ներկայում այն գործում է նաև արտերկրում՝ ԱՄՆ-ում, Ֆրանսիայում, Քուվեյթում, Հնդկաստանում, Վրաստանում:
Ներկաներին լաբորատորիայի ընդհանուր գործունեությունը, նպատակն ու գրանցած ձեռքբերումները ներկայացրել է «Արմաթի» համակարգող Սեդրակ Վարդանյանը։
Թբիլիսի կատարած աշխատանքային այցի շրջանակում ԿԳՄՍ նախարարի տեղակալ Արաքսիա Սվաջյանը նաև հանդիպում է ունեցել Վրաստանի կրթության, գիտության, երիտասարդության նախարարի տեղակալ Բաիա Կվիցիանիի հետ։ Փոխնախարարներն անդրադարձել են ՀՀ և Վրաստանի հանրակրթության ոլորտում իրականացվող բարեփոխումներին և հնարավոր համատեղ ծրագրերին։