ԿԲ նախագահը դժվարացավ կանխատեսել անշարժ գույքի նկատմամբ առաջարկի և պահանջարկի հարաբերակցության փոփոխությունը մոտ ապագայում
1 րոպեի ընթերցում
Հայաստանում տեսանելի ապագայում անշարժ գույքի շուկայում առաջարկի և պահանջարկի հարաբերակցության փոփոխության հնարավորության վերաբերյալ կանխատեսում այս պահին հնարավոր չէ անել: «Արմենպրես»-ի փոխանցմամբ՝ սեպտեմբերի 16-ին ասուլիսում այս մասին նշեց ՀՀ կենտրոնական բանկի նախագահ Մարտին Գալստյանը:
«Առնվազն վերջին երևի թե չորս հաշվետվություններում անընդհատ խոսել ենք գների պոտենցիալ անկման հնարավոր ռիսկի վերաբերյալ: Բարեբախտաբար, այս պահին ունենք մի իրավիճակ, որ գների անկում, եթե նույնիսկ կա, ապա շատ չափավոր է, ու տեղի է ունենում կանխատեսելի հանդարտ հետագծով: Ըստ այդմ, որևէ հավելյալ ռիսկեր այս պահի դրությամբ չենք տեսնում, որովհետև նաև տնտեսական ակտիվության որոշակի արագացում ունենք Հայաստանի Հանրապետությունում:
Ինչ վերաբերում է ապագայում, երկու տարի հետո, առաջարկի ու պահանջարկի հնարավոր դիսբալանսին ՝ կարծում եմ՝ պետք է ապրենք ու տեսնենք, թե ինչ զարգացումներ տեղի կունենան, որովհետև անշարժ գույքի շուկան ինքն իրենով ածանցվում է շատ այլ գործոններից, որոնց մասին այս պահի դրությամբ՝ երկու տարի առաջ նայելով, դժվար կլինի ինչ-որ բան ասել»,- նշեց նա: