ԵԱՏՄ երկրներն արդյունաբերական սեփականության օբյեկտների որոնման համար կգործարկեն միասնական ծառայություն
2 րոպեի ընթերցում
Եվրասիական տնտեսական հանձնաժողովի (ԵՏՀ) խորհուրդը հաստատել է և ԵԱՏՄ անդամ երկրներ է ուղարկել համաձայնագրի նախագիծ, որը նախատեսում է արդյունաբերական սեփականության օբյեկտների վերաբերյալ տեղեկատվության որոնման միասնական ծառայության ստեղծում։
«Արմենպրես»-ի թղթակցի հաղորդմամբ՝ նախաձեռնությունը մշակվել է «ԵԱՏՄ-2025» ռազմավարության շրջանակում։
Ծառայությունը կդառնա ընդհանուր տեղեկատվական հարթակ, որը կներառի ապրանքային նշանների, սպասարկման նշանների, աշխարհագրական նշումների և ծագման վայրերի անվանումների վերաբերյալ տվյալներ՝ հավաքագրված Հայաստանի, Բելառուսի, Ղազախստանի, Ղրղզստանի և Ռուսաստանի պատկան մարմիններից։
Նախագծի նպատակն է ապահովել տվյալների հասանելիություն «մեկ պատուհանի» սկզբունքով՝ առավելագույնս դյուրինացնելով որոնումն ու հասանելիությունը ինչպես իրավատերերի, բիզնես շրջանակների, արտոնագրային մասնագետների, այնպես էլ պետական կառույցների համար։
ԵՏՀ տնտեսության և ֆինանսական քաղաքականության հարցերով նախարար Բախիթ Սուլթանովի խոսքով՝ ծառայությունը պարզապես տեխնոլոգիական լուծում չէ։ Այն ուղղակի ներդրում է նորարարությունների պաշտպանության և արդար մրցակցության խթանման գործում՝ ամբողջ Միության տարածքում։ Այն, ըստ նախարարի, թույլ կտա էապես նվազեցնել թե՛ ժամանակային, թե՛ ֆինանսական ծախսերը՝ ապրանքային նշանի կամ ծագման վայրի անվան յուրահատկությունը ստուգելիս, և կբարձրացնի մտավոր սեփականության իրավունքի պաշտպանության թափանցիկությունն ու արդյունավետությունը։
Ընդհանուր տեղեկատվական ռեսուրսի ձևավորումն ու տեխնիկական սպասարկումը կիրականացնի Եվրասիական տնտեսական հանձնաժողովը։
Ծառայությունը հասանելի կլինի բոլոր շահագրգիռ օգտատերերին՝ անվճար հիմունքներով։