ԵԱՏՄ-ում ներկայացվել է մրցակցության խախտումների գործերի վաղ փուլում կարգավորման վերաբերյալ նոր փաստաթուղթ
2 րոպեի ընթերցում
Եվրասիական տնտեսական հանձնաժողովի (ԵԱՏՀ) մրցակցության և հակամենաշնորհային կարգավորման բլոկը ներկայացրել է մրցակցության խախտումների գործերի վաղ փուլում կարգավորման վերաբերյալ նոր փաստաթուղթ։
«Արմենպրես»-ի փոխանցմամբ՝ այն մշակվել է Տնտեսական համագործակցության և զարգացման կազմակերպության (ՏՀԶԿ) «Եվրասիական տնտեսական միությունում մրցակցության իրավական կարգավորման և քաղաքականության փորձագիտական վերլուծության» եզրակացությունների ու առաջարկությունների հիման վրա։
ԵԱՏՀ մրցակցության և հակամենաշնորհային կարգավորման նախարար Մաքսիմ Երմոլովիչի խոսքով՝ հանձնաժողովի կողմից տրվել էր 26 առաջարկություն, որոնց 85 տոկոսն արդեն կատարվել է։
«Եվրասիական տնտեսական հանձնաժողովը և ԵԱՏՄ անդամ պետությունները հաջողությամբ կիրառում են նախազգուշացման մեխանիզմը, որը նման է փաստաթղթում ներկայացված գործիքներին։ Սա վկայում է ԵԱՏՄ-ում գործերի վաղ փուլում արդյունավետ կարգավորման մասին»,- ընդգծել է նախարարը և ավելացրել, որ աշխատանքը նպատակ ունի խթանել մրցակցային միջավայրի զարգացումը և ապահովել շուկաների արդար ու թափանցիկ գործունեությունը ԵԱՏՄ տարածքում։
Ըստ ներկայացված փաստաթղթի՝ ուսումնասիրվել է միջազգային փորձը՝ մասնավորապես երկու հիմնական գործիքների կիրարկումը՝ պարտավորությունների վրա հիմնված որոշում (commitment) և հաշտության համաձայնագիր (settlement)։ Այս մեթոդները հնարավորություն են տալիս կրճատել ժամանակն ու ծախսերը, ինչպես նաև առավել արդյունավետ վերացնել հակամրցակցային գործողությունների բացասական հետևանքները։ Դրանք, ըստ նախարարի, շահավետ են և՛ մրցակցային մարմինների, և՛ շուկայի մասնակիցների համար։