1 րոպեի ընթերցում
Մեսրոպ Մաշտոցի անվան մատենադարանին են նվիրաբերվել 1861թվականին Բաղդադում գրված «Հիշատակարան սերնդոց Տէր Գաբրիէլի Երևանցւոյ» ձեռագիրն ու հարակից արժեքավոր վավերագրեր, որոնք հարուստ տեղեկություներ են փոխանցում Իրաքի հայ համայնքի պատմության վերաբերյալ:
«Արմենպրես»-ի հաղորդմամբ՝ այս մասին հայտնում են Մատենադարանից՝ նշելով որ «Մատյանների տունդարձը» արշավը շարունակվում է։
Նոր նվիրատվությունը կատարել է Մատենադարանի բարեկամ և նվիրատու, ՀՀ ԳԱԱ պատվավոր դոկտոր Տեր Ներսես (Վրեժ) ավագ քահանա Ներսեսյանը, ով նվիրատվությունը Մատենադարանին է փոխանցել լոնդոնաբնակ հայտնի հայագետ որդու՝ Տիրան Ներսեսյանի միջոցով:
«Մատենադարանը երախտագիտություն է հայտնում Տեր Ներսես (Վրեժ) ավագ քահանա Ներսեսյանին՝ արժեքավոր նվիրաբերության համար»,- ասված է հին ձեռագրերի և փաստաթղթերի պահպանման և ուսումնասիրման կենտրոնի տարածած հաղորդագրության մեջ: