Սարիկ Մինասյանը՝ ՀԷՑ-ի Շիրակի մարզային կառույցի տնօրեն

Սարիկ Մինասյանը ստանձնելու է Հայաստանի էլեկտրական ցանցերի Շիրակի մարզային կառույցի տնօրենի պաշտոնը:

«Արմենպրես»-ի հաղորդմամբ՝ Մինասյանն այս մասին տեղեկացրել է «Ֆեյսբուք»-ի իր էջում կատարած գրառմամբ:

«Ինչպես ինձ վստահված բոլոր պաշտոններում, այստեղ ևս ծառայելու եմ երկրիս՝ ի շահ մեր պետականությանը, ի շահ Հայաստանի Հանրապետությանը:

Մեր երկրի էներգետիկ ոլորտը, որը ռազմավարական նշանակություն ունի, պետք է ամրապնդվի, ուղղի մեջքն ու իրական զարգացման ճանապարհին կանգնի:

Մեծ պատիվ եմ համարում իմ ներդրումն ունենալ ոլորտի կայունացման գործընթացում:

Վստահ եմ՝ սպառողը կարճ ժամանակ անց զգալու է այն դրական փոփոխությունները, որոնց հասնելու ենք»,- նշել է նա:

Սարիկ Մինասյանը Գյումրու ավագանու այս տարվա մարտին կայացած արտահերթ ընտրություններում իշխող «Քաղաքացիական պայմանագիր» կուսակցության քաղաքապետի թեկնածուն էր: