Կառավարությունը հաստատեց քաղաքաշինական նորմատիվատեխնիկական փաստաթղթերի մշակման և հաստատման կարգը
3 րոպեի ընթերցում
Հայաստանի կառավարությունը քննարկեց և հաստատեց քաղաքաշինական նորմատիվատեխնիկական փաստաթղթերի մշակման և հաստատման կարգը, որով սահմանվում են նաև գործող փաստաթղթերի ու ԵՄ նորմերը Հայաստանում մոտարկելու, դրանք մասնակի կամ ամբողջական տեղայնացնելու ներդաշնակեցման կարգավորումները։
«Արմենպրես»-ի հաղորդմամբ՝ ՀՀ կառավարության հուլիսի 24-ի նիստում «Քաղաքաշինական նորմատիվատեխնիկական փաստաթղթերի մշակման և հաստատման կարգը հաստատելու մասին որոշման» որոշման նախագիծը ներկայացրեց Քաղաքաշինության կոմիտեի նախագահ Եղիազար Վարդանյանը։
Նրա խոսքով՝ նախագծի ընդունումը պայմանավորված է «Քաղաքաշինության մասին» օրենքում փոփոխություններ և լրացումներ կատարելու մասին» օրենքի կիրարկումն ապահովող միջոցառման կատարման անհրաժեշտությամբ։
«Նախագծով սահմանվում են քաղաքաշինական նորմատիվատեխնիկական փաստաթղթերի մշակման ռազմավարական ուղղությունները, դրանց մշակման, տեղայնացման, արդիականացման, լրամշակման և հաստատման ընթացակարգերի առանձնահատկությունների վերաբերյալ կարգավորումները, այդ թվում՝ ԵՄ անդամ պետությունների քաղաքաշինության ոլորտի նորմերի մոտարկման, դրանց մասնակի կամ ամբողջական տեղայնացման ու գործող նորմատիվատեխնիկական փաստաթղթերի ներդաշնակեցման կիրառման մասով»,-ներկայացրեց Վարդանյանը։
Նրա պարզաբանմամբ՝ մասնավորապես սահմանված է, որ ԵՄ մոտարկված և տեղայնացված նորմերը ՀՀ տարածքում գործող կառուցապատողները կարող են ընտրել կամավորության սկզբունքով։ Կառուցապատման ծրագրերի համար պատվիրատուների կողմից ԵՄ նորմերի ընտրության դեպքում տվյալ քաղաքաշինական ծրագրերի շրջանակներում նախագծման, շինարարության և շահագործման համար այդ պահանջները կրելու են պարտադիր բնույթ և կիրառվելու են ամբողջ ծավալով։
«Տեղայնացված ԵՄ նորմերը ՀՀ տարածքում կիրառելը թույլ կտա օտարերկրյա ներդրողների, գործարարների, կառուցապատողների, շինարարների համար ստեղծել առավել ընկալելի, ընդունելի և բարենպաստ միջավայր, որն էլ կխթանի նրանց կողմից ՀՀ-ում ներդրումներ կատարելը և գործունեություն ծավալելը։
Արդյունքում ներդրումների աճին զուգահեռ, նաև ՀՀ-ում կունենանք միջազգային չափորոշիչներին համապատասխան կառուցված շենքեր, շինություններ և ենթակառուցվածքներ»,-համոզմունք հայտնեց Քաղաքաշինության կոմիտեի նախագահը։