2 րոպեի ընթերցում
Ճամբարակում հունիսի 11-ին տեղի ունեցած ողբերգական պայթյունի պատճառը, ըստ նախնական տվյալների, եղել է կուտակված գազի պայթյունը։ Դեպքի հետևանքով գրանցվել է 5 զոհ, 12 մարդ հոսպիտալացվել է։ Վերջիններիս առողջական վիճակը գնահատվում է բավարար, նրանցից մեկն արդեն դուրս է գրվել։
«Արմենպրես»-ի հաղորդմամբ՝ կառավարության հունիսի 12-ի նիստում այս մասին տեղեկացրեց ՆԳ նախարարի տեղակալ Արմեն Մկրտչյանը։
«Նախնական պարզվել է, որ գազի արտահոսքի հետևանքով կուտակված գազի պայթյուն է տեղի ունեցել։ Շենքը մասնակի փլուզվել է։ Դեպքի վայր է մեկնել երկու մարտական հաշվարկ, ներգրավվել է 282 փրկարար ծառայող»,-հայտնեց Մկրտչյանը։
Նրա խոսքով՝ շենքի սեյսմիկ և կառուցվածքային գնահատում արդեն իրականացվել է։
«Թեև որոշ բնակարաններ կարելի է օգտագործել, բնակիչներն առայժմ չեն վերադարձել՝ անվտանգության նկատառումներով։ Մարզպետարանի, համայնքի և ՏԿԵ նախարարության մասնակցությամբ բնակիչներին տրամադրվել են ժամանակավոր կացարաններ և անհրաժեշտ աջակցություն։
Այս պահին առանց օթևանի մնացած քաղաքացիներ չունենք», – ընդգծեց ՆԳ փոխնախարարը։
Դեպքի առթիվ հարուցվել է քրեական վարույթ։ Տեղի է ունենում ամբողջական վնասների գնահատում, և հնարավոր փոխհատուցումների հարցը կքննարկվի փաստերի հստակեցումից հետո։
Վարչապետ Նիկոլ Փաշինյանը խորին ցավակցություն հայտնեց զոհվածների հարազատներին՝ ընդգծելով, որ նման ողբերգական դեպքերը կանխելու համար անհրաժեշտ է բարձրացնել անվտանգության և տեխնիկական ստանդարտների մակարդակը։
«Ստանդարտների առկայությունն ու դրանց իրականացումն է, որ մեզ թույլ կտա կամ խուսափել կամ նվազագույնի հասցնել նման դեպքերը։ Պետք է շարունակաբար աշխատել այդ ուղղությամբ»,-ընդգծեց վարչապետը։