386.2
2 րոպեի ընթերցում
Հարկ վճարելը յուրաքանչյուր քաղաքացու կարևոր և կամային որոշումն է։ Վճարելով հարկերը՝ հնարավոր է ապահովել պետության ֆինանսական կայունությունը, կառուցել դպրոցներ, վերանորոգել ճանապարհներ, աջակցել առողջապահությանը, կրթությանը և խթանել տնտեսական աճը։ «Արմենպրես»-ի հաղորդմամբ՝ այս մասին նշվում է Պետական եկամուտների կոմիտեի՝ հարկ վճարողների օրվա առթիվ հրապարակած տեսանյութում։
«Յութուբ»-ի պաշտոնական էջում հրապարակված «Հարկ վճարելու կարևորությունը՝ տարբեր ոլորտների գործարարների տեսանկյունից» վերնագրով տեսանյութում անդրադարձ է կատարվում հարկերի վճարման դերին պետական կառուցակարգերի կայացման մեջ։
Տարբեր ոլորտների ներկայացուցիչներ կարևորել են մասնավոր բիզնեսի մասնակցությունը պետության կայունության և զարգացման գործում։ Ըստ նրանց՝ հարկ վճարելը բիզնեսի կողմից պետությանն աջակցելու միակ ուղիներից է, որն ուղղակի ազդեցություն ունի պետության ներքին ամրության և հասարակական համակարգերի արդյունավետության վրա։
Գործարարները շեշտում են, որ հարկ վճարելով՝ ստեղծվում են աշխատատեղեր, զարգանում է տնտեսությունը, և ապահովվում է այն կայուն միջավայրը, որտեղ մարդը կարող է ապրել, ստեղծել և ներդրում կատարել իր տեսլականի իրագործման համար։
Նրանց կարծիքով՝ հարկերի վճարումն արտահայտում է ոչ միայն տնտեսական պարտականություն, այլ նաև քաղաքացիական կամք՝ ապրել երկրում, աջակցել նրա բանակին, մշակույթին, կրթությանը և առողջապահությանը։ Սա ընկալվում է որպես ներդրում ոչ միայն ներկա բարեկեցության, այլ նաև ապագա հասարակության ձևավորման գործում։