Ուկրաինայի բարձրաստիճան պատվիրակությունը ժամանել է Փարիզ՝ բանակցություններ վարելու եվրոպացի և ամերիկացի պաշտոնյաների հետ
2 րոպեի ընթերցում
Ուկրաինայի նախագահական գրասենյակի ղեկավար Անդրեյ Երմակը, արտաքին գործերի նախարար Անդրեյ Սիբիհան և պաշտպանության նախարար Ռուստեմ Ումերովը ժամանել են Փարիզ՝ քննարկելու Ուկրաինայի անվտանգության երաշխիքները և հանդիպում անցկացնելու ամերիկացի պաշտոնյաների հետ: «Արմենպրես»-ի փոխանցմամբ՝ այս մասին հայտնում է Kyiv Independent-ը։
«Այցի շրջանակում նախատեսվում են մի շարք երկկողմ և բազմակողմ հանդիպումներ «կամեցողների կոալիցիայի» մեջ մտնող և անվտանգության երաշխիքներ տրամադրելու ունակ երկրների ներկայացուցիչների հետ, այդ թվում՝ Ֆրանսիայի, Գերմանիայի և Միացյալ Թագավորության», - գրել է Երմակը X սոցիալական հարթակում։
Նա հավելել է, որ հանդիպումներ են նախատեսված նաև ԱՄՆ-ի ներկայացուցիչների հետ, որոնք Ֆրանսիայում են։
Միևնույն ժամանակ ԱՄՆ պետքարտուղարության հայտարարության մեջ նշվել է, որ Ֆրանսիան հյուրընկալել է ԱՄՆ պետքարտուղար Մարկո Ռուբիոյին և հատուկ բանագնաց Սթիվեն Ուիթքոֆին, որոնք Ֆրանսիա են ժամանել «նախագահ Թրամփի՝ Ռուսաստան-Ուկրաինա պատերազմին վերջ դնելու նպատակն առաջ տանելու համար»։
Մեծ Բրիտանիայի և Ֆրանսիայի գլխավորած «կամեցողների կոալիցիան», որում ներգրավված է մոտ 30 երկիր, ստեղծվել է մարտին՝ հրադադարի դեպքում Ուկրաինային անվտանգության երաշխիքներ տրամադրելու նպատակով: Կոալիցիայի վեց անդամներ պատրաստակամություն են հայտնել իրենց զորքերը տեղակայել Ուկրաինայում՝ հրադադարը վերահսկելու համար: