Ռուսաստանի ԱԳՆ-ն հայտնել է միջուկային արդյունաբերության ոլորտում Մյանմայի և Վիետնամի հետ համագործակցության մասին
2 րոպեի ընթերցում
ՌԴ-ի «Ռոսատոմ» պետական կորպորացիան պատրաստ է մասնակցել Վիետնամում ատոմակայանի կառուցմանը, Ռուսաստանի Դաշնությունը պատրաստ է նաև Մյանմայի հետ հետագա համագործակցությանն ատոմային ոլորտում։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտնել է ՌԴ ԱԳՆ ներկայացուցիչ Լյուդմիլա Վորոբյովան։
Դիվանագետը հավելել է, որ Ռուսաստանի գործընկերները ԱՍԵԱՆ-ի երկրներից այս կամ այն չափով հետաքրքրված են իրենց երկրում միջուկային էներգետիկա ստեղծելու հնարավորություններով։ Նա հիշեցրել է, որ վերջին մի քանի տարիների ընթացքում «Ռոսատոմը» մեծ ջանքեր է գործադրել Մյանմային աջակցելու՝ ազգային միջուկային ենթակառուցվածքի զարգացման և մասնագիտացված անձնակազմի պատրաստման, էներգետիկայի և միջուկային տեխնոլոգիաների և միջուկային բժշկության ոչ էներգետիկ կիրառման հարցերում փորձի փոխանակման գործում։
«Այս տարվա մարտի սկզբին մասնագիտացված միջկառավարական համաձայնագրի ստորագրման շնորհիվ ստեղծվել է իրավական դաշտ՝ համապատասխան նախագծի իրականացման մեկնարկի համար: Սակայն ակնհայտ է, որ սա միայն առաջին քայլն է: Մենք հաստատակամորեն հավատարիմ ենք Մյանմայի և Վիետնամի մեր գործընկերների հետ համատեղ ու հետևողական համագործակցությանը», - հավելել է Վորոբյովան:
