Նիդեռլանդների ԱԳ նախարարն այցելել է հայ-ադրբեջանական սահմանային գոտի

Նիդեռլանդների արտաքին գործերի նախարար Կասպար Վելդկամպը և նրա գլխավորած պատվիրակության անդամները Եվրոպական միության դիտորդական առաքելության ուղեկցությամբ այցելել են հայ-ադրբեջանական սահմանային գոտի։ 

«Արմենպրես»-ի հաղորդմամբ՝ այս մասին նշված է ՀՀ-ում ԵՄ դիտորդական առաքելության X-ի միկրոբլոգում կատարված գրառման մեջ։

«Պատիվ է հյուրընկալել Նիդեռլանդների արտաքին գործերի նախարար Կասպար Վելդկամպին, Հայաստանում Նիդերլանդների Թագավորության դեսպան Մարիկե Մոնրոյ-Վինթերին և Հայաստան այցելած պատվիրակությանը»,-նշված է դիտորդական առաքելության գրառման մեջ։ 

Honoured to host Dutch Foreign Minister Caspar Veldkamp, Ambassador Marieke Monroy @marieke_monroy, and the visiting delegation. #EUMA HoM briefed @ministerBZ on the Mission’s activities and current situation during a patrol to border areas. pic.twitter.com/cPAJRp2Q66

— European Union Mission in Armenia (@EUmARMENIA) March 12, 2025

Հայաստանում ԵՄ դիտորդական առաքելության ղեկավար Մարկուս Ռիտերը իրականացված պարեկության ընթացքում Նիդեռլանդների ԱԳ նախարար Կասպար Վելդկամպին է ներկայացրել առաքելության գործունեությունը, հայ-ադրբեջանական սահմանին տիրող իրավիճակը։

Հայաստանի և Ադրբեջանի սահմանային գոտի այցելությունից հետո X-ի իր միկրոբլոգում գրառումներ է կատարել նաև Նիդեռլանդների ԱԳ նախարար Կասպար Վելդկամպը՝ նշելով, որ ԵՄ դիտորդական առաքելության ներդրումը տարածաշրջանում կայունության և անվտանգության ամրապնդման գործում անգնահատելի է և վստահություն է ստեղծում տեղի համայնքներում:

Նախարարը նաև գոհունակություն է հայտնել առաքելությանը կատարած աշխատանքի առնչությամբ՝ ընդգծելով, որ Նիդեռլանդներն աջակցում է այդ գործունեությանը։

I commend EUMA Head of Mission Markus Ritter and his team for their pioneering work setting up this mission. The Netherlands supports their efforts. 2/2

— Caspar Veldkamp (@ministerBZ) March 12, 2025

Նիդեռլանդների արտաքին գործերի նախարար Կասպար Վելդկամպը Հայաստան է այցելել մարտի 12-ին։ Այցի շրջանակներում նա հանդիպումներ է ունեցել ՀՀ վարչապետ Նիկոլ Փաշինյանի, ԱԳ նախարար Արարատ Միրզոյանի հետ, մասնակցել Հայաստանում Նիդեռլանդների դեսպանատան պաշտոնական բացման արարողությանը։ Կասպար Վելդկամպն ու Արարատ Միրզոյանը ստորագրել են Հայաստանի և Նիդեռլանդների միջև ռազմավարական գործընկերության մասին հռչակագիր։