1 րոպեի ընթերցում
Միացյալ Նահանգները փետրվարի 24-ին ՄԱԿ-ի Գլխավոր նստաշրջանին կներկայացնի Ուկրաինայի հակամարտությունը լուծելու «պատմական բանաձևը»։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտարարել է ԱՄՆ պետքարտուղար Մարկո Ռուբիոն։
Նա X սոցիալական ցանցում գրել է, որ ԱՄՆ նախագահ Դոնալդ Թրամփը հավատարիմ է հակամարտությունը դադարեցնելուն։ «Երկուշաբթի օրը ԱՄՆ-ն պատմական բանաձև կառաջարկի ՄԱԿ-ին, որին պետք է աջակցեն ՄԱԿ-ի բոլոր անդամները»,- նշել է Ռուբիոն:
ԱՄՆ Պետդեպարտամենտի կայքում տեղադրված հայտարարությունը նաև ընդգծում է, որ բանաձևը համապատասխանում է Թրամփի այն տեսակետին, որ ՄԱԿ-ը պետք է վերադառնա Կանոնադրության մեջ ամրագրված իր հիմնարար նպատակին՝ պահպանել միջազգային խաղաղությունն ու անվտանգությունը, այդ թվում՝ վեճերի խաղաղ կարգավորման սկզբունքը։
«Մենք հաստատապես հավատում ենք, որ այժմ ժամանակն է պարտավորվելու վերջ տալ պատերազմին, սա մեզ համար հնարավորություն է ստեղծում իրական խաղաղության հաստատման համար», - ընդգծված է հայտարարության մեջ։