Ուկրաինան և ԱՄՆ-ն մոտ ապագայում կստորագրեն օգտակար հանածոների վերաբերյալ համաձայնագիր. Մայք Ուոլց
2 րոպեի ընթերցում
Ուկրաինայի նախագահ Վլադիմիր Զելենսկին նախատեսում է ստորագրել ռազմավարական համաձայնագիր Միացյալ Նահանգների հետ, որը վերաբերում է Ուկրաինայի օգտակար հանածոներին։ «Արմենպրես»-ի հաղորդմամբ՝ այս մասին հայտնել է ԱՄՆ նախագահի ազգային անվտանգության հարցերով օգնական Մայք Ուոլցը, ով ելույթ է ունեցել Պահպանողական քաղաքական գործողությունների համաժողովում։
«Տեսեք, էությունն այն է, որ նախագահ Զելենսկին կստորագրի այս գործարքը, և դուք դա կտեսնեք մոտ ապագայում, և դա լավ է Ուկրաինայի համար», – ընդգծել է ԱՄՆ առաջնորդի խորհրդականը։
Ուկրաինայի նախագահի գրասենյակի ղեկավար Անդրիյ Երմակը հեռախոսազրույց է ունեցել Մայք Ուոլցի հետ, որի ընթացքում քննարկվել են Ուկրաինայի և ԱՄՆ-ի միջև երկկողմ հարաբերությունները և ռազմավարական համագործակցության ամրապնդման ուղիները։
«Մենք կարծիքներ ենք փոխանակել Ուկրաինայի և ԱՄՆ-ի միջև դիրքորոշումների մերձեցման շուրջ։ Նշել ենք երկկողմ համագործակցության պահպանման և Ուկրաինա-ԱՄՆ հարաբերությունների բարձր մակարդակի կարևորությունը», – հայտարարել է Երմակը՝ շնորհակալություն հայտնելով Ուկրաինային ցուցաբերվող ամերիկյան աջակցության համար։
Ամերիկյան Axios պարբերականը հայտնում է, որ Ուկրաինան և ԱՄՆ-ն ամբողջ գիշեր բանակցություններ են վարել օգտակար հանածոների վերաբերյալ համաձայնագրի կնքման շուրջ։
Նշվում է, որ իրավիճակին ծանոթ ամերիկացի պաշտոնյան հայտնել է, որ որոշումը պետք է կայացնի Ուկրաինայի նախագահ Վլադիմիր Զելենսկին՝ անվանելով սա «վճռորոշ պահ Ուկրաինայի համար»։
Այնուամենայնիվ, ԱՄՆ ներկայիս առաջարկի ստույգ պայմանները դեռևս հայտնի չեն։