3 րոպեի ընթերցում
«Արմենպրես» լրատվական գործակալությունը ներկայացնում է իր հեղինակային «Նոր գիրք» նախագիծը: Այն ամեն երկուշաբթի ընթերցողի դատին է հանձնում հայաստանյան հրատարակչությունների լույս ընծայած գրքերը:
Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի մասին, ծանոթանալ դասական գործերին և արդի գրականության զարգացման միտումներին:
Այս շաբաթ «Արմենպրես»-ն առանձնացրել է 2024 թվականի վերջին և 2025 թվականի սկզբում հրատարակված և հանրության դատին հանձնված տարբեր հրատարակչությունների ուշագրավ գրքեր՝ տարբեր խորագրերի ներքո:
Հայ գրականություն. Ավետ Բարսեղյան, «Հայելիս»
«Հայելիս» բանաստեղծությունների ժողովածուն Ավետ Բարսեղյանի անդրանիկ գիրքն է: Գրքում յուրաքանչյուր տող ինքնաբացահայտման փորձ է, որը ընթերցողին հնարավորություն է տալիս նայել մարդուն, կյանքին և սիրուն` Ավետի հայացքով։ Գիրքը բացահայտում է հեղինակի հոգու ամենանուրբ անկյուններn՝ անկեղծությամբ և առանց զարդարանքի։ «Ազնիվ»` այդպես է բնորոշում Ավետի պոեզիան ընթերցողը։ Գիրքը լույս է ընծայել Newmag-ը։
Մանկապատանեկան գրականություն. Մարիա Կրյուգեր, «Կարոլչան և կապույտ ուլունքը»
Փոքրիկ Կարոլչան հատակի տախտակների ճեղքում պատահաբար մի կապույտ ուլունք է գտնում: Կախարդակա՛ն՝ ցանկություններ կատարող ուլունք:
Հենց այսպես էլ սկսվում են Կարոլչայի ու նրա անբաժան ընկերոջ՝ Պետրիկի անհավանական արկածները...
… իսկ չար կախարդ Ֆիլոմենան դավեր Է նյութում, թե ինչ անի, որ ուլունքին տիրանա...
Թարգմանությունը՝ Նունե Թորոսյանի։ Գիրքը լույս է ընծայել «Անտարես»-ը:
Փաստավավերագրական գրականություն. Ուիլ Գիդարա, «Անսովոր հյուրընկալություն»
Անձեռոցիկի վրա գրված անհավանական նպատակը վերածվել էր իրականության...Ծառայության և առաջնորդության մասին դասերի այս գիրքը, որն ամփոփվել է հյուրընկալության ոլորտում մեծ փորձի արդյունքում, շեշտում է մեկ սկզբունք, որը միշտ ակտուալ կլինի` հոգ տանել մարդկանց ցանկությունների մասին։ Նոր հմտություններ` համագործակցություններից մինչև թիմի ներսում աշխատանք, կատարելության ձգտում, ճանաչման ձեռքբերում... գիրքը Ձեզ կարող է տալ այս ամենը և շա՜տ ավելին։ Գիրքը լույս է ընծայել Corporate Library-ն։
«Նոր գիրք»-ը ներկայացրեց Ռոզա Գրիգորյանը
